ORANJESTAD (AAN): Segun Sharline Koolman di Departamento di Salud, cifranan actualisa ta mustra cu esnan riba 60 aña ta esnan cu a fayece y esaki ta algo cu ta sosode mundialmente, no solamente na Aruba.
Ta mira cu den e ultimo simannan, mas tanto esnan cu no ta vacuna a wordo interna y esnan cu no ta vacuna ta esnan cu casi no ta mira ta wordo interna mas. Esaki tin di haber cu e 'booster' cu a wordo duna ultimo y e asistencia di hende pa tuma nan vacuna, Koolman a indica.
Departamento di Salud ta haya tur e informacionnan aki algun dia despues, pero ora di haya nan ta traha riba e datonan pa uze den diferente angulo pa por wak mas claramente kico mester haci cu e maneho.
Sharline Koolman a remarca cu data no ta djis pa tin cifranan. "Data ta pa bo traha bo maneho cu ne, haci algo cu ne, intervencion mester sosode pa e tin un balor agrega. Sino data no tin ningun balor".
Ora cu DVG ta wordo pidi pa duna data, e epidemiologo Gerreth Tromp ta haci esaki, pero comunidad mester haci algo cu e data tambe. Ora di puntra cuanto hende a fayece y si ta vacuna of no, y DVG ta haci nan best pa produci e informacion aki, e ora a yega tempo pa comunidad haci algo cu e data aki, e Crisis Team Leider a splica.
No por keda produci data y ora di pidi pa bay vacuna y mustra cu e vacuna berdaderamente tin un impacto, DVG ta gewoon keda pidi mas data, Koolman a declara.
