Ta bolbe reduci tarifa di awa entrante 1 di September

Minister Glenbert Croes a anuncia

*Tarifa lo wordo reduci di 38% te na 26% 

ORANJESTAD (AAN):  Minister Glenbert Croes a yama un conferencia di prensa diamars atardi unda el a haci un anuncio importante den presencia di Director di WEB NV, Alfredo Koolman, Director di NV Elmar, Anthony Irausquin y Director di Utilities, Anthony Rojer.

            El a bisa cu dos siman pasa Utilities, ELMAR, WEB y su persona a reuni cu sindicatonan riba nan preocupacion relaciona cu e aumento di awa.  Durante dicho reunion manera Minister Glenbert Croes mes a expresa, Sindicatonan a bin cu un bon proposicion.

            Sindicatonan a haci e cuestionamento di pakico pa e grupo di menos entrada, ta haya un aumento mas halto.  E  mandatario na mes momento a gradici WEB enormemente cu a para habri pa e recomendacionnan di Sindicato.

            A keda palabra cu lo bolbe bek na mesa despues di dos siman pa asina por a haci algun ehercicio pa wak con por a socialisa e tarifanan mas den cuadro di e aumentonan. E dia ey tabata diamars mainta.

            Durante e reunion WEB a bin bek cu e proposicion, aproba pa Gobierno di Aruba, pa honra peticion di e sindicatonan: ta bolbe reduci e aumento di tarifa di awa entrante 1 di September igual pa tur.

            Si mira e grafico adhunto, si antes e aumento tabata 38%, entrante 1 di september e lo reduci esaki te na 26%, igual pa tur catergoria di tarifa.

            E mandatario a aprecia e participacion y recomendacion di sindicatonan y ta gradici WEB pa nan disponibilidad sigui traha hunto pa bienestar di pueblo.

   Apenas siman pasa tambe, varios gremio a cuestiona di con net awor cu prijs mundial di crudo ta cayendo, prijs di gasolin y diesel na Aruba tambe a cay... y ta net awor WEB Aruba NV y NV Elmar a bay hisa tarifa di utilidadnan.  E no tabata ‘make-sense’.

   Na comienzo a bisa cu ta te aki 6 luna lo bolbe revisa e tarifanan aki, pues na Januari 2023.  Siendo cu por nota cu prijs di petroleo ta sigui baha.  Diamars merdia pa atardi mes, e bari di WTI Petroleo a cay te na $85 pa bari.

   Pues awor a wordo anuncia cu aki 15 dia, tarifa di awa lo bolbe baha.  Aunke oficialmente no a bisa nada di tarifa di coriente.  Den un otro articulo, por lesa con Gobierno tin pensa di haya aprobacion di Washington, pa por cumpra HFO Oil for di Venezuela pa usa na WEB Aruba NV.