E fundraising ta pa yuda Casa Cuna Progreso:
ORANJESTAD (AAN) — E studiantenan di Universidad di Aruba, Bryan Barrero, Sheeleh Arends, Julianne Gomez, entre otro, a tuma iniciativa pa yuda Stichting Casa Cuna Progreso.
Stichting Casa Cuna Progreso ta un instancia cu ta yuda muchanan di 0 pa ocho aña di edad; nan ta un shelter pa muchanan cu ta maltrata, cu ta wordo descuida, nan ta cuida nan.
Tambe nan tin un seccion cu yama “Teeners Mother Huis”. Bryan a comenta cu nan ta aprecia cu Casa Cuna Progreso ta yuda e muchanan local, y nan wak e balor cu tin inverti den nan, cu ta e futuro di Aruba.
Pa tal motibo nan a bin cu e iniciativa cu yama “Foodie Festival” cual lo tuma lugar Diasabra di e siman aki, esta 7 di Mei, di 7 pa 11 or di anochi, na Plaza Nikki Habibe. Universidad di Aruba tambe a yuda nan door cu e ta un proyecto di scol, unda tin cu haci fundraising pa yuda un fundacion den e comunidad, y nan a dicidi pa scoge Casa Cuna Progreso pa realiza e proyecto aki.
Sheeleh Arends tambe a duna informacion y a bisa cu e evento aki ta parecido na algo cu a wordo organiza un par di aña pasa, unda cu chefnan ta bin hunto y e publico por scoge kico nan kier come, y ademas lo tin un desert truck, y tur esaki ta acompaña pa bon musica y bon ambiente e anochi aki. E proposito principal ta recauda fondo pa e muchanan di Casa Cuna Progreso, pero tambe pa tur esnan cu bishita e evento por pasa un rato ameno hunto cu nan famia. Ta bay tin 'Kids Corner' pa e famia por bin cu nan muchanan y esaki ta algo cu comunidad di Aruba tambe mester.
