ORANJESTAD (AAN) -- Jose Fernandes Perna, ta un di e oradornan cu lo hiba palabra durante e “Conferencia Enseñanza Nos Responsabilidad”, cu lo wordo organiza pa G-297, IPA y SIMAR.
Fernandez Perna a cuminza expresando cu por bisa cu enseñanza na Aruba ta bon toch, anto pakico cambie? “E ora ey bo ta haya hopi persona cu ta haci observacion, por ehemplo: ‘mira aki, Arubiano ta domina cuater lenga; pa cuminza, Papiamento, Spaño, Ingles y Hulandes. Un otro argumento pa bisa cu nos sistema di enseñanza ta asina bon, ta e hecho cu hopi studiante ta sigui nan estudio den exterior, tanto na Merca como na Hulanda, den nos propio region, principalmente Costa Rica, Colombia, y asina aki nos por menciona mas. Cu otro palabra, si tur esaki ta posible esey ta nifica cu nos sistema di enseñanza, mester ta bon”, Fernandes Perna a expresa.
El a agrega cu e ta kere cu esnan tras di mesa, pero tambe esnan dilanti, e publico, a pasa den e sistema di enseñanza di Aruba.
“Kiermen, cu nos conoce e sistema di enseñanza cu nos ta papia di dje. Y berdad, nos como organizador di e conferencia aki, no ta desmenti cu e sistema tin hopi parti bon, pero tin otro partinan cu nos por mehora. E ta bay pa mehoracion, no djis cambia e sistema di enseñanza, pero pa locual por mehora y ta pidi pa cambionan, esey nos tin cu haci’e”, Fernandes Perna a remarca.
El a agrega cu den e Conferencia lo trata tur e temanan cu su colega Chando Pietersz a trece dilanti. Fernandes Perna ta kere cu e tema “Lenganan den Enseñanza” ta sumamente importante, y mas ainda ta un necesidad.
“Nos como pais chikito y como destinacion turistico mester yega na un bon dominio di e cuater lenganan cu nos a caba di menciona y si por, hasta pa algun di nos, algun idioma adicional, cu nan tambe por scoge den un sistema di enseñanza renova”, Fernandez Perna a indica.
Di e forma aki, Arubianonan por comunica cu resto di mundo cu no ta papia Papiamento, y tambe por ricibi su bishitantenan di cualkier parti di mundo, den nan idioma, of den idiomanan internacional, pero riba un bon dominio. “Haciendo algun cambio, aunke nan ta chikito, nan ta pidi si, un procedure fundamental; haci un cambio den e didactica con bo ta ofrece un lenga stranhero, por ehemplo, haciendo nan adaptacion cu aworaki nos sa. Haciendo esey, bo por tin un miho dominio. Mester tin si, un maneho di lenganan, pasobra no ta un so, pero e ta bay den combinacion cu e cuater lenganan central cu nos ta papia di dje un biaha mas: e mesun Hulandes, Spaño, Ingles, sin laga afo e lenga nacional di Aruba: Papiamento cu te na e momento aki tin espacio den Enseñanza, pero nos por mehore”, Fernandez Perna a remarca.
