Studiantenan di OGM di Universidad di Aruba a realisa un estudio na Bureau Traimerdia

ORANJESTAD (AAN):  Desde 1996 Bureau Traimerdia ( BTM) a sa di ofrece atencion, orientacion,

cuido y guia di calidad halto na mucha di 4 te cu 12 aña cu ta asisti na scol basico y  scol special despues di scol . Alabes ta contribui na nan desaroyo social y emocional pa sigura un ambiente safe, personanan feliz y saludabel den nos comunidad den oranan di merdia.

            BTM ta den un proceso di  desaroyo y di cual ta den e proceso di implementa protocolnan oficial cu lo yuda reforsa e operacion  BTM y garantisa e consistencia di calidad y servicio na e 8 centronan cu ta ubica den e edificionan di scol publico den diferente districto di Aruba.

            BTM actualmente ta guiando un total di 750 mucha entre 4 pa 12 aña di scolnan basico y special, cu un lista di espera ± 400 mucha.

            E studiantenan di segundo aña di e Facultad di OGM di Universidad di Aruba a inicia na November 2023 un estudio riba “ Client Satisfaction” y a acerca Bureau Traimerdia (BTM) como e  organisacion pa realisa nan investigacion.

             Meta di e investigacion aki ta  pa colecta data cu por yuda BTM pa compronde e dinamica y servicio di e organisacion y  yuda na impulsa decisionnan strategico.

            Recientemente , Maart 01, 2024 directie y tur centrumhoofd di BTM a haya presentacion di e resultado di e  investigacion  for di e studiantenan di Universidad. Tabata un presentacion sumamente amplio y cu  informacionnan valioso cu sigur lo sa di yuda BTM pa sigui brinda un miho servicio na su clientenan cu den e caso aki ta e mayornan y muchanan.

            BTM kier gradici Universidad di Aruba y na su studiantenan di OGM pa nan investigacion y pa acerca y scoge BTM como e organisacion pa realisa nan investigacion, di cual BTM ta sumamente gradici pa nan sosten y dedicacion durante ful e proceso.

            Sigur tur e data cu a wordo colecta lo contribui y yuda  na e strategia di BTM cu lo optimalisa e servicio pa cu su clientenan y sigui brinda un bon servicio na nos clientenan.