Stichting Rancho y Fundacion Lanta Papiamento cu lectura interesante riba Dia di Idioma Materno

ORANJESTAD (AAN):  Den cuadro di Dia Internacional di Lenga Materno, Stichting Rancho a organisa un lectura tocante idioma Papiamento.

            E oradornan invita tabata e Magister linguistico Ramon Todd Dandaré y Dr. Joyce Pereira. Dos persona cu a pone hopi curason, alma, sodo, pa mantene Papiamento y mehora Papiamento y trec'e den un manera cu ta exigi internacionalmente pa purba pa mantene un idioma di un pueblo.

             Clifford Rosa, Presidente di Stichting Rancho a duna di conoce cu nan tabata educando y celebrando e dia internacional di idioma materno, caminda cu pa nan como fundacion, conservando e historia y cultura di e bario di Rancho y tambe sigur pa Aruba, ta sumamente orguyoso di por a traha hunt cu Fundacion Lanta Papiamento pa asina e anochi aki por tabata un anochi exitoso caminda cu e dos presentadornan a elabora riba nan trabao relaciona cu idioma Papiamento.

            Rosa a agrega cu e anochi aki tambe tabata un dialogo, un conversatorio di locual Fundacion Rancho ta bin ta haciendo pa asina den e charla tin un espacio pa intercambia pensamento, haci pregunta, duna sugerencia y tambe ta critico.

            El a agrega cu e parti di ta critico ta pa mehora e materia y e materialnan cu mester pa asina duna comunidad un educacion na su lugar.

            Mester remarca cu tabata un lectura hopi interesante cu a conta cu un publico hopi entusiasta y interesa den idioma Papiamento.