Parlamentario Tromp-Lee a indica:
ORANJESTAD (AAN) — Parlamentario Shailiny Tromp-Lee durante e conferencia di prensa di fraccion di MEP, Diaranzon mainta, a informa cu Diadomingo venidero, esta dia 26 di Februari, un delegacion di Parlamento ta biahando pa e reunion di IPKO, cu e biaha aki ta bay tuma lugar na Curacao.
Manera ta usual, e encuentro aki ta cuminza cu un reunion tripartite, unda cu miembronan di Parlamento di Aruba, Curacao y Sint Maarten ta sinta pa dialoga riba temanan cu nan tin den comun.
Shailiny a bisa cu e biaha aki e topico di mas importante ta e parti di 'geschillenregeling', un bez mas. “Mi ta kere cu ta un terminologia bon conoci caba; lamentablemente durante añanan hopi biaha a traha riba e tema aki, unda cu tin disputa huridico, entre e Isla y Hulanda, y hopi biaha como isla no tin un caminda ni un proceso encamina”, e parlamentario a señala.
E 'geschillenregeling' awor ta riba mesa atrobe, y Aruba ta indica cu e disputa huridico aki ta bay wordo poni den un organo independiente di tur gobierno den Reino, y su conseho mester ta obligatorio. “Akinan semper tabata e punto caminda cos ta tranca. Ban spera cu enberdad tin e boluntad politico y cu awo cu den acuerdo di gobernacion cu Hulanda ta para cu mester bay minimiza e deficit democratico existente, nos lo logra cu e concepto cu awo lo keda presenta, lo keda carga y lo keda aproba”, Shailiny Tromp-Lee a señala.
