Stichting Musica a anuncia Tsunami como 'Band of the Year'

ORANJESTAD (AAN): Basa riba e criteria di Band of the Year cu Stichting Musica a bin ta anuncia anteriormente, un cuerpo di hurado distribui riba e rutanan di Carnaval a evalua cua ta e banda cu a contribui mas durante Carnaval 69.

E criteria tabata lo siguiente: (*) E banda mester a participa na Aruba Caiso & Soca Monarch 2023 y/of Festival di Tumba 2023. (*) E banda mester a participa na entre otro e siguiente paradanan di Aruba su Carnaval 2023 (no ta necesario pa participa na tur parade): Parada di Luz San Nicolas. Lighting Parade Oranjestad, parade di Jouvert Morning, Parada Grandi na San Nicolas y e Grand Parade na Oranjestad. (*) E banda cu e miho animacion den paradanan.  (*) E banda su zonido.  (*) Presentacion di e banda su trailer den e paradanan.  (*) E banda mester toca e Soca ganador di Aruba Caiso & Soca Monarch 2023 y/of e Tumba ganador 2023.

   Di e forma ey, Banda di Aña 2023 a bira ‘Tsunami’.  Nan a a destaca durante di e evaluacion di hurado y como Band of the Year 2023 ta gana e suma di 5000 Florin como premio. Por mira cu Tsunami ta haci nan maximo esfuerzo pa mantene un bon calidad di zonido y presentacion, mientras cu nan ta duna bek na e pueblo den forma di gozo y entretenimento. 

  Un pabien ta bai di parti Stichting Musica pa tur banda musical cu a participa na Aruba Caiso & Soca Monarch 2023 y tambe na e paradanan di Carnaval 2023. Aruba a disfruta di un tremendo temporada di Carnaval cu bunita costumes y excelente musica.