Union durante Carnaval mester haya continuacion awor
- E normal di ayera a perde na e horizonte mundial nobo
- Aruba tin e armanan necesario pa un futuro exigente
ORANJESTAD(AAN)- Cu entrada di 2023, Aruba despues di dianan di fiesta a prepara su mes pa bishita di Cas Real y e fiesta di Carnaval.
Ambiente den cual Aruba a drenta 2023 a diferencia for di e ultimo añanan cu tabata den cuadro total di Covid-19 y medidanan.
Aruba a bolbe na normalidad, ta e palabranan hopi uza pero cu no ta cuadra completamente cu realidad.
E normalidad cu Aruba y henter mundo a conoce ayera, a pasa pa pasado. Mundo a cambia y e cambionan grandi cu lo a bira decisivo pa loke tabata futuro, a presenta nan mes acopla na mas cambio cu no a wordo spera.
Ya prome cu Covid-19 tabata conoci, cu petroleo lo mester a despedi un dia. Un asunto sumamente serio pa un mundo cu un economia den cual petroleo tabata decisivo pa entrada di paisnan.
Prome cu Covid-19 tabata conoci cu mundo lo mester a tuma mas medida pa confronta e cambio di clima, cu ta bay tin influencia enorme y ya tin influencia grandi riba planeta Tera.
E situacion no a bira mas facil cu e problemanan na Ukraine, cu a deshaci di e stabilidad mundial y a hinca mundo den un guera mundial cu a percura pa inseguridad mundial.
Pa henter mundo loke tabata e factor principal pa confronta futuro, tabata sin duda e libertad cu hende a recobra pa biaha y celebra, cu tabata tin un impacto asina grandi cu circulacion di placa a evita cu hende lo a cay den e realidad di recesion, cu ainda ta presente, aunke medidanan na tur parti di mundo a baha su influencia.
E normalidad nobo di mundo, no ta e realidad cu tabata existi prome cu Covid-19 riba ningun tereno y paisnan mester paga debenan grandi den cual nan a hinca nan curpa.
Aruba no ta un diferencia den esaki y mester biba cu medidanan, cu mester sigura cu lo tin futuro pa e pais.
Tin factornan importante cu a dicidi pa loke ta spera Aruba na 2023 durante cual e salida di pandemia ta reactiva mundo, pero manera ya a wordo bisa, problemanan serio tambe mester haya atencion.
Inflacion no a wordo completamente domina y prijsnan ta sigui subi riba panorama mundial.
Gastonan operacional di companianan rond mundo ta aumenta y manera ta conoci medidanan cu mester wordo tuma den cuadro di cambio di clima, lo exigi hasta cambio den e cuminda cu nos ta come.
Decisionnan mester wordo tuma den seno di Reino y Maart ta bira importante ora den seno di Reino Aruba mester splica con e ta bay reforma, aunke basicamente e aumento di BBO na 2022 a percura pa e entrada cu Aruba, cu a conoce un recuperacion economico, tabata e medida grandi.
Di otro banda Reino ainda mester dicidi si Aruba mester paga e 500 Miyon na prestamo den tempo di Covid-19.
Si Reino no dicidi cu e no ta cobra Aruba e sumanan envolvi, problema ta bati na porta.
Mientrastanto Aruba a marca un logro cu su decision pa deshaci di petroleo y habri porta pa hidrogeno, cu manera DIARIO a splica for di 2022, tabata central den e maneho Hulandes pa bandona e era di petroleo.
Cu atraccion di companianan riba e tereno aki, Aruba ta amplia su capacidad economico y asina nivel di bida.
Carnaval a termina. Aruba mescos cu henter mundo mester bolbe na bida normal.
Kico lo ta normal? Un normal nobo, cu lo exigi pa enfrenta retonan na tur nivel cu DIARIO lo sigui splica pa asina hunto cu Aruba enfrenta e retonan cu ta spera.
