Stichting Miss IQ di Hulanda den cooperacion cu un compania local, a manda container cu material escolar

ORANJESTAD (AAN) – Rudy Lampe, Minister di Enseñanza, Ciencia y Desaroyo Sostenible,  tabata presente na Scol Primario Santa Filomena na San Nicolas,

cu a haya un regalo inmenso for di Stichting Miss IQ di Hulanda, den cooperacion cu un empresa local, cu a percura cu material pa e scol a yega for di Hulanda.

E mandatario a splica cu esaki ta un donacion di diferente scol di Hulanda, na unda ta conoci cu tin fussering di scolnan, y pesey material escolar hopi nobo ta nan ta duna scolnan di Aruba como regalo.

Minister Lampe a subraya cu esaki ta un gran ayudo pa scolnan local, y cu durante e tres y pico añanan aki cu e ta minister di enseñanza, diferente containers cu materia a bin tanto di Hulanda como di Stichting help de kinderen, di Corsow cu tambe ta yuda Aruba.

E dignatario a menciona cu e biaha aki ta scolnan di SKOA, entre otro, ta e beneficiarionan di e materialnan aki. E material colecta pa Stichting Miss IQ, boluntariamente, ta consisti di stoel, buki, entre otro. E donacionnan aki ta un ayudo grandi mirando e situacion financiero di Gobierno, e minister a acentua.

Minister Lampe a señala cu, naturalmente, pa e muchanan ta mas agradable si e material cu nan ta haya na scol ta mas nobo posible, y e por a ripara na diferente scol na Aruba cu e bankinan, entre otro material, no ta apropia mas y mester reemplaza nan, pero e limitacionnan financiero ta haci cu no tur ora por haci esey. Pesey e donacionnan aki ta masha hopi bon bini.

Den nomber di Gobierno y di Pueblo di Aruba, y di tur e alumnonan di Scol Basico Santa Filomena, Minister Rudy Lampe a expresa palabranan di danki na Stichting Miss IQ y e compania local cu a haci esaki posible y cu hunto por traha pa e futuro di Aruba cu ta nos muchanan.

E director di Scol Basico Santa Filomena Mario Nooijen tambe a expresa su gratitud pa e dos instancianan ya menciona y a pidi tur presente un aplauso grandi pa nan. El a pidi nan bin dilanti pa habri e porta di e container y wak kico tin den dje.