Stichting Bloedbank Aruba mester di 1500 donante mas

Aruba ainda ta bao di e porcentahe standard - *Awe ta lanza website nobo - ORANJESTAD (AAN) – Den e contexto di e 'Dia Mundial di e Donante di Sanger 2021',

cu ta wordo celebra awe, Dialuna 14 di Juni, Matutino DIARIO a entrevista e director di Stichting Bloedbank Aruba, Fabian Werleman.

Aña tras aña, Mesa di Redaccion ta brinda atencion na e dia asina importante aki, purbando di forma parti di e meta cu e dia aki tin, cu ta concientiza comunidad en general, tocante e necesidad cu Bloed Bank tin di dispone di suficiente sanger den reserva, pa e casonan di urgencia cu por presenta na Hospital, y e unico fuente di e recurso aki, ta e donantenan.

Fabian Werleman a duna di conoce cu e aña aki tampoco tin un actividad cu invitacion pa publico, pero si ta ricibi donantenan bao medidanan basta stricto, mirando cu ainda ta den pandemia y Hospital no por core ningun riesgo. Ta un dia tambe pa gradici e donantenan pasobra nan ta yuda Bloedbank y cu esaki comunidad, boluntariamente.

Durante henter siman nan ta ricibi donantenan pero esaki ta bay via afspraak, Werleman a indica.

Awe, riba e Dia Mundial di Donante, Bloedbank Aruba lo gradici tur su donantenan y e ta un dia special si, den sentido cu Hospital lo ricibi bishita di Secretario di Estado di Hulanda, ken lo pasa na Bloedbank tambe hunto e Director y Gerencia di Hospital dr. Horacio Oduber, unda tambe lo tin e lanzamento di e website nobo di Banco di Sanger.

Pa locual ta e cantidad di donante, Aruba ainda ta bao e cantidad standard cu ta e 3% di e poblacion, cu den e caso di e populacion ta 3 mil donante activo, pero na Aruba ta conta cu 1.5%, ekivalente na 1.500 donante.

Fabian Werleman ta pensa cu podise hopi hende tin e boluntad pa bira donante, pero no tur  por bin na remarca sea pa nan condicion di salud of kizas nan estilo di bida cu no ta haci esey posible.

Pero e ta spera si, cu e website nobo y moderniza, por yuda mehora e contacto di Bloedbank cu e donantenan potencial y cu lo por aumenta e average na e cantidad rekeri.