Representacion oficial di Pueblo Arubano den decadencia serio
- Logro di Betico mester ta e instrumento principal di autonomia
- Criminalidad no por tin asiento den asamblea di Pueblo di Aruba
ORANJESTAD (AAN) Manera semper, a base di informacion corecto, DIARIO a splica Pueblo, tin un diferencia grandi entre un lucha pa separacion di un pais of otro forma di comunidad y Status Aparte.
Separacion di dos parti di un teritorio, por comberti e teritorionan como dos parti separa di otro identidad, cu ta mantene e gobernacion di e pais manera e historia di Aruba mes, cu tabata parti fi “West”separa for di “Oost”ta mustra.
Autonomia ta nifica cu un pais ta carga su propio responsabilidad pa su responsabilidad directo y tin su propio reglanan y leynan, manera e concepto di Status Aparte ta exigi.
E concepto cu Betico Croes a entrega na Reino, no a cambia solamente e destino di Aruba, pero tambe e constelacion di Antia Hulandes, cu a base di e lucha di Betico Croes, a stop di existi.
Un Pueblo ordena y democratico, mester di un sistema di gobernacion di Pueblo y ta esaki ta motibo di existencia di Parlamento di Aruba, cu a bira realidad den e lucha di Betico Croes, kende a bira e lider cu a entrega na Aruba, gobernacion propio y directo di e pais, hancra den Parlamento.
Dia Prome di Januari 1986, Parlamento di Aruba a bira e logro mas grandi den historia legal di Aruba den epoca moderno pero na mes momento tambe, e derota mas grandi di Betico Croes, kende tabata lucha pa su bida den Hospital di Aruba y mester a wordo traslada pa exterior, mientras Aruba tabata celebra e victoria cu Betico Croes a alcansa pa Aruba.
Con por tabata posibel cu e persona cu a entrega na un pais e derecho pa un isla yama su mes pais, no por a sigui dirigi e Pueblo den e epoca cu a resulta di su lucha y tabata e victoria cu el a entrega na su pais?
E contenido real di democracia, cu a nace for di Husticia cu ta wordo haci cu un Pueblo y cu tur su ciudadanonan, no ta presente den e forma cu un ganador di eleccion ta asumi e puesto cu eleccion a entrega su persona.
Na 1985 Betico Croes a bay atras den voto pa e hecho, cu mientras e tabata recupera y lucha pa su bida despues di un tiroteo cu casi a causa su morto despues cu el a hiba Aruba na e triunfo di Status Aparte, Venezuela y Exxon tabata tin problema cu prijs di petroleo pa e refineria di Aruba, cu Exxon a dicidi di cera den un tempo cu mundialmente refinerianan tabata wordo cera.
Esaki a conduci na e decision di Exxon pa cera Lago, cu a wordo uza contra Betico Croes.
Esaki tambe a bira e final di e careda di husticia den politica na Aruba, cu a haya un Gobierno cu no tabata di acuerdo cu e lucha di Betico Croes pa Status Aparte.
E salida di Lago a wordo uza como arma contra Betico Croes na e eleccionnan di 1985, ora e logro di Status Aparte dor di Betico Croes, a pone contrincantenan di e lucha di Betico Croes na poder.
E Leynan cu ta regla Parlamento como centro di democracia y husticia na hende y pais, a wordo uza pa e derota di Betico Croes, loke a haci cu e autenticidad di e deseo di Pueblo a bay perdi.
Partidonan cu a perde eleccion, a forma Gobierno.
Na 2024, e Parlamento pa cual Betico Croes a lucha, mester conoce un rehabilitacion y final di leynan cu ta permiti pa hasta un persona cu a wordo condena pa Huez na prison, ta forma parti di e representacion di Pueblo di Aruba.
Con por considera Parlamento, cu ta e instituto poderoso cu mester representa caracter, moral di Pueblo di Aruba y e logro mas grandi di e lucha pa Status Aparte di Betico Croes, representativo pa Pueblo di Aruba mientras e tin un miembro cu a wordo condena na castigo di prison dor di Huez pa crimen?
Parlamento cu ta central den e logro estatal di Betico Croes, cu ta Status Aparte, hustamente mester lanta para pa pone un fin na e scandalnan den mundo politico di Aruba.
Awe e partido cu a deshaci di e logro di Betico Croes na 1986, tin persona condena pa Huez como su representante den Parlamento di Aruba, cu mester conoce rehabilitacion pa por refleha Husticia, cu tabata tambe base di e felicidad di Pueblo di Aruba cu pa medio di e lucha di Betico Croes, a bira pais autonomo den Reino Hulandes!
Eleccion pa Parlamento a bira e herment pa opositornan di Status Aparte por a derota Betico. Awe rehabilitacion di Parlamento mester evita, cu buraconan den Ley ta sostene un moral cu no ta Arubano!
