Invitacion pa pueblo celebra Dia di Betico

ORANJESTAD (AAN): Riba Diahuebs ta observa Dia di Betico na ocasion di e fecha natalicio di Aruba su Libertador, gran estadista, politico, maestro y lider stima pa su Pueblo, sr. Gilberto Françios 'Betico' Croes.

Manera costumber riba e fecha aki lo tin diferente actividad rond di Aruba, sinembargo Minister Maduro kier haci un invitacion special pa Pueblo acudi dia 24 y 25 di januari na Plaza Libertador G.F. Betico Croes pa rindi homenahe na e lider inmortal y stima di nos Pais.

   Manifestacion Cultural: E invitacion ta pa awe Diaranson acudi na Plaza Betico na unda lo tuma luga e Manifestacion Cultural cu lo cuminsa pa 6’or di atardi cu presentacion di Caha di Orgel, feria culinario, boca dushi y artesania. Pa 8’or di anochi e programa oficial cu Himno di Aruba, sigui pa discurso di Minister Maduro di Cultura. E programa lo sigui cu show di canto, baile, musica. E presentacion di e hobennan di Tipico Colegio Arubano y despues un concierto presenta pa un orkesta, bao encargo di e maestro Dwight Leonetta, cu lo acompaña varios di nos artistanan local cu o interpreta cancionnan dedica na Betico Croes.

   Acto Protocolar: Riba Diahuebs 25 di januari riba Dia di Betico, Pueblo ta keda invita pa e Acto Protocolar riba Plaza Betico na unda cu Minister President Wever-Croes lo hiba un discurso. E mainta aki ta cuminsa 9or cu canto, poesia y baile di nos muchanan dedica na e lider stima Betico Croes. Ademas lo tin e acto di ofrenda floral na estatua di nos Libertador.