Un sentencia di Huez na Hulanda ta ilustra problemanan serio
- Mas validez posicion DIARIO pa reino uni den un solucion
- Cantidad maximo pa asilo politico cu mester conoce regla
ORANJESTAD (AAN) Asilo politico no por resulta den un caos social. Esaki ta base di un sentencia di Huez den a introduci un cantidad maximo na e cantidad di refugiadonan cu por haya asilo politico na e ciudad Hulandes Ter Apel.
E cantidad di refugiadonan cu por keda na e centro na Ter Apel a bira Dos Mil persona. E organo central cu ta atende e asuntonan aki, tin cuatro siman di tempo pa cumpli cu e orden di Corte di Husticia.
E sentencia di Huez directamente ta relata na e posicion cu Gabinete Evelyn Wever-Croes a asumi despues cu refugiadonan den e region Caribense, a cuminsa busca solucion pa nan realidad desastroso na Aruba.
Te motibo cu Aruba no por a atende cu mas refugiado, a wordo bon splica dor di Prome Ministro Evelyn Wever-Croes y ta cuadra completamente cu e veredicto di Huez na Hulanda.
Basicamente ta wordo conclui, cu na momento cu asilo politico wordo duna na un persona, e pais cu ta brinda un cas nobo, mester por garantisa na e refugiado, un bida humano y circumstancianan cu ta coresponde mas na condicionan humano cu e lugar caminda a bira imposibel.
E responsabilidad cu un pais ta asumi pa medio di asilo politico, a bini claramente dilanti den e veredicto di Huez, caminda e comunidad di e ciudad Hulandes, Ter Apel, a bay busca su derechonan.
Huez a bay di acuerdo cu mester bini un solucion y cu e organisacion cu ta ocupa su mes cu problemanan di refugiadonan mester tene su mes na reglanan cu ta wordo impone.
Si e organisacion no tene su mes na regla, y no reduci e cantidad di refugiado te un maximo di 2 Mil persona, e mester paga un multa di 15 Mil Euro pa cada dia cu e surpasa e cantidad cu un maximo di castigo di 1.5 Miyon Euro.
E situacion por wordo considera inhumano, pero kico realmente ta socede cu refugiadonan cu a bira victima di situacionnan mundial, cu Nacionnan Uni no por atende manera na cantidad di ocasion DIARIO a trece dilanti.
Nacionnan Uni ta faya den e tarea mas importante di percura pa un mundo den cual drama humano ta wordo reduci considerabelmente dor di atende cu causantenan di drama humano, manera mester atende.
Pakico tin refugiado? Pakico hende mester sufri hamber, persecusion y dolor na tanto pais?
Pasobra tin lidernan falso, cu a base di violencia y manipulacion, a haya poder pero ta wordo permiti dor di Nacionnan Uni pa keda na poder.
Na reunionnan di Nacionnan Uni por tuma nota di causantenan di drama humano cu ta abusa di nan poder, pa dicidi pa henter mundo kico lo socede.
Con e causantenan di problema por yuda soluciona problema cu nan mes ta causa?
Rond mundo refugiadonan ta keda un problema serio pa motibonan cu a bini dilanti den Corte na Hulanda.
Ta trata aki di un topico sumamente emocional pero cu conoce un realidad. Si un pais no por atende na forma adecuado cu refugiado, e calidad di bida, condicionnan y oportunidad cu e ta ofrece e refugiado, ta bira un desastre social cu por haci cu e refugiado ta cay den problemanan serio.
Kico un pais por ofrece refugiado, ta e tema cu a bini dilanti den e caso aki tambe y cu ta bira valido pa henter mundo atende na forma racional.
Atrobe mester mira den direccion di Nacionnan Uni sigur na momento cu mundo conoce mas situacion explosivo cu mundo conoce trankilidad.
For di momento cu a alcansa paz despues di Segunda Guera Mundial, mundo no a conoce paz pasobra mundo a bay trata na alcansa paz, na forma cu no tabata cuadra cu e motibo di tanto problema.
Pa Aruba e sentencia dicta na Hulanda sigur ta un indicacion cu e pais tabata tin razon ora Prome Ministro Evelyn Wever-Croes a mustra, cu Aruba no por asumi un responsabilidad cu e no por carga.
E defensa di costo di Aruba mientrastanto, manera DIARIO a adverti, ta mas cu nunca necesario na caminda pa eleccionnan na Venezuela y desaroyonan mundial ta amenaza trankilidad internacional.
Na mes momento ta keda un pregunta grandi, cu tambe na hopi occasion DIARIO a presenta.
Kico lo pasa cu e migracion entre Aruba y Hulanda despues di formacion di un Gobierno Hulandes nobo, di cual tur partido a splica, cu e momento a yega pa Hulanda atende e cantidad di problemanan social propio, cu mester haya atencion!
