Colegio Nigel Matthew a participa e aña aki den proyecto interactivo “Get the Message”

James Sneek, director di FTPH-131:

James Sneek, Director di Fundacion Telefon pa Hubentud (131) den un entrevista cu Hubentud den Movecion, a elabora riba nan proyecto “Get the Message”, cu desde 20 di November 2018, ta tumando lugar tur 20 di November, Dia Mundial di Derechonan di Mucha.

“Esaki ta un proyecto cu Dia 20 di November, algo mas cu siete aña caba, nos ta organizando; den e caso aki, cu sosten di Meta Corp ‘The Movies’, unda cu nos ta wak ‘short movies’ cu e muchanan”, James a indica.

E biaha aki nan tabata tin como invitado Colegio Nigel Matthew cu a participa den esaki. “E ta un manera interactivo cu e mucha y e hoben cu actualmente ta gusta wak peliculanan cortico. Y den tur pelicula cu nos ta mira tin un mensahe. Y kico nos ta haci, ta analiza diferente ‘short movies’. Nos ta sinta cu nan. Nos ta papiando di peliculanan di entre 3 pa 6 minuut ongeveer, cu ta net e momento cu bo tin nan atencion ainda”, James Sneek a indica.

Despues di esaki nos ta analiza cual derechonan nan a mira cu a bin dilanti den e peliculanan di duracion cortico. “Nos tin tambe dialogo cu ta tuma lugar, unda nan ta expresa tambe con nan ta haya cu e derecho aki ta tuma lugar aki na Aruba, con e ta wordo aplica door di Gobierno, instancianan, comunidad, banda di esey tambe nan kier expresa con nan lo kier mir’e mañan, den futuro”, James Sneek a subraya. El a remarca cu mester corda cu e hobennan aki den futuro lo asumi e posicion den e cambionan cu nan ta pensa cu mester tuma lugar, y cu nan ta wordo impulsa riba con importante ta pa nan por expresa nan mes tocante e diferencianan cu nan kier mira mañan den comunidad, y ta importante pa for di awo caba nan cuminza expresa esaki tambe”, James Sneek, director di 131 a señala.