ORANJESTAD (AAN): Den entrevista cu DIARIO, representantenan di Soroptimist International Club Aruba (SICA)
a splica tocante nan tayer inspirativo y informativo cu lo tuma luga diadomingo awo. E tayer lo enfoca pa duna tur participante oportunidadnan pa explora e metodo di ‘design thinking’ y hermentnan di auto-innovacion. Den e session dinamico aki, bo lo siña mira bo mes den un manera nobo, mas strategico—pa empodera bo mes pa tuma control di bo desaroyo personal y profesional.
E facilitado, Stephanie G.D. Croes, ta un strategista creativo cu hopi experiencia den diseño basa riba necesidad di e ser humano. Su metodo ta stimula claridad, creatividad y accion, duna participantenan e empuhe cu nan tin mester pa mira mas leu, pensa mas profundo, y traha cu mas proposito.
E tayer lo tuma luga dianan 30 di November y 7 di December 2025 di 9:00 AM pa 1:00 PM na EduCampus Aruba, (ex Bon Bini Bazar). Entrada lo ta gratis. E tayer ta patrocina pa UNESCO, Emerging Twenty Fifty, y Soroptimist International Club of Aruba (SICA).
