Solicitud di e sindicatonan pa traha menos ora pa luna no ta wordo otorga

Eliminacion di recorte di 12.6% no ta posibel ainda --- *Gobierno cu proposicion pa elimina 5% a cambio di 13 dia di ATV

ORANJESTAD (AAN):  Prome Minister Evelyn Wever-Croes a duna di conoce diamars atardi den un declaracion publico riba Facebook cu Gobierno di Aruba a manda un carta na sindicatonan SADA, SIMAR, SPA y SEPPA cu referencia na e carta fecha 31 januari 2022 di e Sindicatonan menciona den cual Sindicatonan e.o. ta informa Gobierno cu mirando e hecho cu no ta kita e cortamento den salario di empleadonan publico cu e 12.6%, lo bay over na traha menos ora na un forma ekivalente na e cortamento di 12.6%.

            Gobierno di Aruba den varios ocasion a comunica na Sindicatonan, cu Gobierno ta simpatisa cu e lucha di e Sindicatonan pa cu e recorte di 12.6%. Un di e condicionnan di Hulanda pa Aruba por bin na remarke pa e sosten di likides, ta e recorte pa tempo indifini riba e salario di e empleadonan publico. Aruba ainda ta depende di e sosten di likides aki pa por cumpli cu su obligacionnan.

            Gobierno a informa Sindicatonan y ta mantene e opcion riba mesa pa duna bek 100% di e salario (pues elimina e 5%) y a cambio empleadonan publico por entrega 13 dia di ATV of entrega un combinacion di dia di ATV y otro componentenan ekivalente na e 5%, pa asina por sigui cumpli cu e condicion di Hulanda.

            Gobierno a informa Sindicatonan cu no ta bay di acuerdo cu e solicitud di Sindicatonan pa kita e recorte di 12.6%. Di mes un forma Gobierno ta informa Sindicatonan cu teniendo na cuenta e bienestar general di Aruba y e necesidad pa ricibi e sosten di likides, Gobierno no por bay di acuerdo cu e solicitud di Sindicatonan pa bay traha menos ora pa luna, ekivalente na 5% di e salario.

            Gobierno ta haci un suplica na Sindicatonan pa sigui sinta na mesa di negociacion pa hunto yega na un solucion responsabel na beneficio di empleadonan publico y Aruba en general.