ORANJESTAD(AAN)—E eleccion di 25 di Juni 2021 lo mester dicidi pa algo sumamente importante. Kico lo socede cu e situacion financiero di Aruba, cu lo refleha riba bida social y calidad di bida na Aruba?
DIARIO ta tuma nota di cantidad di pensamento cu ta wordo ventila den e ambiente politico na Aruba prome na caminda pa e momento cu votadonan lo dicidi riba e destino di Aruba.
Mester menciona e palabranan “destino di Aruba” pasobra e eleccionnan di Juni 2021 lo ta mas cu un decision pa un partido politico.
Eleccion 2021 lo dicidi kico lo pasa na Aruba for di 2021 adelante.
E panorama presente na Aruba ta papia di cantidad di partido chikito cu lo tin problema pa bira e partido cu ta bay forma Gobierno. Eleccion 2021 lo bira e ocasion pa Aruba dicidi si e kier keda cu maneho di Evelyn Wever-Croes of si e ta bolbe bou Mike Eman, pero na un forma diferente for di 2009 pa 2017.
Hopi a cambia for di e momento cu Mike Eman a desaparece for di mapa na 2017 y awe.
Ora Mike a desaparece, Hulanda a aparece cu exigencianan mas grandi pasobra e barco di Citgo tambe a pega na man di Mike Eman cu a destrui e situacion financiero di Aruba.
Mike por scoge kende cu e kier pa crea un scenario cu no ta existi, pero loke e no por deshaci di e berdad cu ta den su contra.
DIARIO a duna prueba di e destruccion financiero di Aruba na man di Mike Eman cu su grupo elitario, academico aunke tur otro partido tambe tin hende academico y sigur cu mas experencia cu e grupo di Mike Eman cu mester gara duro na loke politica ta ofrece.
Ora analisa kico Mike y su grupo elitario a haci cu Aruba, mester scucha Raymond Knops cu a declara cu Aruba lo a bati bancarota sin placa di Hulanda.
Prome cu Mike a bay eleccion 2013, e tabata sa cu el a zink Aruba, pero e por a sconde tras di su circo. Na 2014 Hulanda a pone fin na esaki y Mike mester a bebe Ensure.
El a yega na un deal cu Nicolas Maduro.
Awor cualkier deal na mundo por fracasa. Pero cu Nicolas Maduro e tabata destina pa fracasa.
Sinembargo Citgo a duna Mike Eman oportunidad di bisa Aruba cu e pais lo a conoce un crecemento economico di 15 porciento. A base di e promesa falso, Mike Eman a sigui crea debe pa Aruba y a uza placa cu Valero a entrega pa Citgo por drenta, pa scapa su mes na eleccion 2017.
Awe wega a caba. E promesa di crecemento economico cu 15 porciento di Mike Eman a bira medida di Hulanda, cu no ta bay permiti Mike bolbe drenta Fort Zoutman pa bebe Ensure pa haya mas forsa pa abusa di placa di Aruba.
Hulanda a papia palabra cla. Na e momento cu fiesta cuminsa, placa Hulandes a bay.
Si cualkier politico Hulandes kier keda cu un voto na Hulanda, e ta bay den Tweede Kamer y bisa cu Mike por bolbe fiesta cu placa di Aruba y haya asistencia Hulandes.
Cualkier Prome Ministro cu sinta, mester cumpli cu e acuerdo cu Aruba a firma cu Hulanda no solamente pasobra tabata tin Covid-19 pero pasobra tabata tin Gabinete Mike Eman, manera tur analisis di cifra ta mustra y manera Mike mes a demostra ora el a bati retirada na 2017 pa bolbe ora Evelyn Wever-Croes a drecha loke el a trata di destrui.
Na e momentonan aki tur instancia local y internacional ta mustra cu Aruba a drenta e fase di recuperacion, cu ta exigi pa riba corto plazo economia expande pa asina duna trabou pero tambe nivela e peso di medida fiscal.
Evelyn Wever-Croes tin plannan concreto pa baha e gasto di bida y asina permiti un economia cu miho circulacion no a base di mas proyecto cu placa di Pueblo mester paga manera PPS, cu Hulanda a bisa cu ta un fiesta cu no por ripiti.
En corto. Awor Aruba mester carga su responsabilidad pa futuro. Si Pueblo vota pa Mike, Pueblo sa cu lo tin hopi blaas di tur color ta bay laira. Si Pueblo scoge pa Evelyn Wever-Croes, Pueblo sa cu lo tin pan riba mesa hasta den tempo cu mester paga pa e debenan cu Mike a laga atras y di Covid-19 cu asistencia di Hulanda.
