ORANJESTAD(AAN)- “E acuerdo cu Quanten a firma cu Angola ta basicamente similar na e loke Quanten ta ofrece Aruba. Quanten a basa su mes riba un refineria na Africa y uno na e continente Americano.
Parti di e grupo di companianan cu ta uni den e proyecto na Angola, tambe lo kier uni den e proyecto na Aruba.”
Esaki ta informacion cu DIARIO a ricibi na nivel internacional riba dos compania cu na final di 2020 a sinta na mesa cu Aruba pa proyectonan cu por duna inicio na un fase nobo di industrialisacion na Aruba.
Aunke 2020 sigur tabata dificil pa economia internacional, e no a stroba Quanten pa sigui negocia cu e gobierno di e pais y yega na un acuerdo, cu a wordo firma dia 17 di Maart 2021 pa realisacion di un refineria cu mester habri su portanan na 2024.
Segun informantenan, Angola a scoge Quanten di un total di 31 compania cu a bati na su porta cu un oferta pa realisa e proyecto di refineria na e pais, cu ta considera e refineria crucial den su plannan di desaroyo.
Segun informacion e consortium, grupo di compania cu ta uni den Quanten Angola LLC, ta parcialmente presente tambe den Quanten Aruba Consortium si e acuerdo entre e compania y Aruba por wordo firma.
Informantenan ta indica cu esaki por wordo anuncia riba un termino hopi cortico y hasta ta wordo papia di e siman venidero.
Pa loke ta trata Eagle LNG, cu kier trece un centro pa destribui gas den Region di Caribe na Aruba, DIARIO a wordo informa, cu recientemente tabata tin reunion entre Gobierno di Aruba y Eagle LNG, cu tin tur intencion pa sigui cu su plannan na Aruba.
Informantenan a indica na DIARIO, cu Eagle LNG mescos cu tur compania a sinti e efectonan di Covid-19 na 2020. Ta hustamente e desaroyonan a base di Covid-19 a crea mas interes den region di Caribe pa gas natural como un combustibel mas barata.
Esaki ta haci cu e proyecto cu Eagle LNG kier inicia na Aruba, sigur ta sumamente importante den e planificacion total di Eagle LNG, cu ta mira expansion di su negoshi den region di Caribe.
Pa Aruba e informacionnan cu DIARIO a ricibi ta mustra cu e siman aki por trece noticia importante pa Aruba y inicio di un cambio den e situacion economico y financiero di e pais.
“Aruba ta drenta un siman decisivo pa su futuro,” informantenan a indica.
Nan a mustra cu mientras Refineria di Aruba tabata negocia cu e companianan Eagle LNG y Quanten Consortium Aruba, Aruba mester traha tambe riba su recuperacion financiero cu no por depende solamente di medida, pero mester drenta awor e epoca di expansion economico cu ta produci e placa necesario pa e pais por atende su asuntonan financiero cu a wordo seriamente afecta pa e maneho financiero di gobierno anterior y despues pa e pandemia.
DIARIO ta sigui en busca di mas informacion di mas desaroyo importante cu ta wordo spera den curso di e siman aki.
