Show ‘Aruba orguyo di nos tur’ tabata e escenario pa talentonan local uni y briya

Ministro di Cultura Maduro:

ORANJESTAD (AAN): E momento principal durante di e Manifestacion Cultural, Dia di Himno y Bandera tabata e presentacion di e show musical cu a hiba e nomber “Aruba Orguyo di Nos Tur”. Un espectaculo yena cu talento y creatividad di baile, musica, canto y poema cu a worde skirbi pa e talentoso Edselyn Figaroa y produccion di studio di Rygel Isabella.

   E show musical aki a worde acompaña en bibo pa e orkesta cultural bao direccion di e maestro Sr. Danny Koolman. Cada cantante tabata worde presenta riba pantaya pa yiunan di tera cu a sobresali den un of otro ramo y cu ta haci nos orguyoso di ta biba riba Aruba. Ademas un escenario yena cu audio, visuals y efectonan di luz cu a pone nos artistananan local riba escenario luci y briya henter anochi. 

   Show: E anochi aki nos a uni pa celebra Aruba y a refleha nos cultura Arubano, recordando nos historia, nos tradicion y nos hendenan pasobra Aruba ta orguyo di nos tur. Algo diferente e aña aki tabata cu prome cu cada artista presenta un personahe di Aruba tabata trece un mensahe riba e pantaya riba escenario manera e prome a trece un grabacion di Harry Croes den feliz memoria, cual sigur tabata un momento emocional. A sigui cu pa cada presentacion tabata tin diferente personahenan reconoci local manera Nen Flores, Karol Croes, Gilberto F. Croes, Tica Basha Abou, Clyde Harms, Derrel Lampe, Jhon Freddy Montoya, Karixon, Antonieta Booi, Vivian Wever, Vivian Lampe, Ronella Croes, Maybeline Arends Croes y Janine Rodriquez, Kamilah Dammers, Brainer y Djondrick y Pastor Andry.

   E show e inicia cu ‘Fiesta den cunuco” baila pa Popcorn Dancers. A sigui e cancion “Mami bin contami e storia” den background cual a worde acompaña pa Grupo di Baile Popcorn Dancers. A sigui cu e clasico “Cunucu di Seit” acompaña pa grupo di baile Popcorn, e hoben Giorvin Angela y Guizza Steenvoorde.

  E obra musical aki a conta cu presentacion di e gran cantante Rolindo Dortalina, cu a pone e popular cancion ‘Aruba awe ta conoci!’ trece un ambiente total riba Plaza Libertador G.F. Betico Croes. A sigui un baile di Youth in Action riba e ritmo di “Un Bandera tan special”. Chazz Dancers a baile e cancion “Muchanan Sabi”. Otro cancion cu a resona e anochi aki tabata “Aki ta mi cas” cu a worde canta pa Lily Rodgers. HTH a baila e cancion di Datapanik “Hende di tur hende”.

   Jerrino Ridderstap a presenta “Danki Papa Dios” un bunita interpretacion di gratitud cu a worde acompaña cu baile di e Grupo Dazzlings Dancers. E grupo di baile Chazz Dancers a presenta un baile riba e cancion “Mi Aruba”. Otro talento local cu a luci riba stage tabata Gino Panneflek presentando e cancion “Esun di mas Bunita” cu a worde acompaña pa un show di baile di grupo “Youth in Action”, a sigui presentacion di Club di Movimiento acompaña pa poeta Joan Danies cu a declama Poesia "Dushi hende" riba cancion wals “Preciosa”. E bunita voz di Raquel Lampe interpretando e cancion “Nos ta dushi hende” a lanta e sentimento y orguyo di ta arubiano. The Popcorn Dancers a presenta un Potpourri, Aruba Mix.

   E duo Jerwin Hernandez y Zaïna Falconi a briya riba escenario cu e cancion “Aruba ta bida”. E cancion ‘Loke ta di nos” a worde baila pa Porcorn Dancers. Un biaha mas nos artista Mitch Almary a capta e atencion di e publico cu e cancion “Agente di Paz”, cu a worde acompaña pa e bailarina di Club di Movimiento y studiantenan di Scol di Polis. E diferente cantante, poeta y gruponan di baile a recorda nos ken nos ta, di unda nos ta bin y na unda nos ta bay.

  E show a culmina cu e presentacion di un potpourri di Carnaval presenta pa Rodrick "Rocco" Franken, Ganado di Groovy Soca 2024, sigui pa Carl "Galloway Jr." Roosberg, Ganado di Power Soca 2024 y e legendario Claudius “Mighty Talent” Phillips, kendenan hunto a presenta un show fantastico y espectacular cu a pone plaza Betico Croes den un ambiente di fiesta celebrando nos Dia Nacional di Himno y Bandera.