Directora di Departamento di Relacionnan Exterior Aruba:
ORANJESTAD (AAN): Jocelyne Croe,s directora di Directie Buitenlandse Betrekkingen Aruba (Departamento di Relacionnan Exterior), voorzitter SDG Commissie a duna di conoce cu ainda e 17 puntonan pa logra metanan di desaroyo sostenibel 2023 ta un reto.
Croes a indica cu mundialmente a bin ta wak cu despues di Covid-19, na luga di tene progreso den e 17 metanan aki, a haya cu e progreso a bay atras. Esey ta di lamenta, a expresa, pero di otro banda sa cual tabata e impacto cu e pandemia a laga mundialmente. Banda di esey, ta experimentando un situacion basta insigur mundialmente cu gueranan grandi na Ukraine, Medio Oriente y esey ta afecta bida di tur hende door di e costo di bida cu ta subi.
Jocelyne Croes a sigui bisa cu tin un impacto mundial cu ainda ta wordo refleha y ta haci cu ta cay atras den logra e metanan di desaroyo sostenibel pa 2030.
"Nos ta biba den un mundo global unda nos tur ta interconecta y den esey tur hende ta wordo afecta. No ta Aruba so. Tur pais di mundo ta wordo afecta", a expresa.
E bunita di e metanan aki ta cu nan ta duna un herment, un compas na e paisnan pa wak con nan por mehora e calidad di bida y reduci desigualdad. E ta un 'to-do-list', un compas pa tur hende por alinea nan mes na dje pa yuda drecha e calidad di bida siguiendo e 17 puntonan aki y logra hopi mas si ta traha conhuntamente, a bisa.
Den un isla chikito manera Aruba, cada ciudadano por refleha riba e metanan aki y alinea pa haci cambionan grandi pa drecha e calidad di bida di tur hende. Esey ta algo esencial di e agenda aki, Jocelyn Croes di DBB a remarca.
E agenda a wordo crea cu participacion di mas di 10 miyon hende na nivel mundial. Si e 10 miyon hendenan aki bisa cu esaki ta metanan comun pa drecha e planeta, calidad di bida di tur hende, e situacion social di cada persona ariba e mundo aki, lo por yega na un mundo mihor, a agrega.
E SDG's n' ta un ley. E ta un compromiso boluntario di cada pais, pero e bunita di dje ta ancra den e derechonan internacional, derechonan humano. Esey ta haci cu unabes cu traha riba SDG's bo ta bezig tambe ta implementando derechonan humano den bo mesun pais, e representante di DBB a finalisa bisando.
