SETAR cu donacion na cuater fundacion pa e temporada di Fin di Aña

ORANJESTAD (AAN): Pa medio di nan campaña di Christmas Kindness, SETAR ta haci un bunita donacion na cuater fundacion.

E coleganan di Mercadeo durante e luna di december a haci entrega di check na representantenan di cada fundacion, esta Fundacion Contra Violencia Relacional, Fundacion Santa’s Cause, Fundacion Stimami Sterilisami y Fundacion Pa Nos Comunidad.

            Fundacion Contra Violencia Relacional a ricibi AWG 2.500 pa por sigui ofrece sosten y recurso na esnan cu ta sobrevivi violencia basa riba genero y violencia domestico. Fundacion Santa’s Cause a ricibi AWG 5.000 pa nan proyecto di fin di aña cu ta enfoca riba reparti regalo pa nos muchanan y hobennan di menos recurso.

            Fundacion Stimami Sterilisami a ricibi un check di AWG 6.500 pa sigui cu nan programa di sterilisacion di pushi y cachonan cu ta na cas of riba caya. Y Fundacion Pa Nos Comunidad a haya un check di AWG 12.500 pa por sigui yuda esnan di menos recurso cu comestibel y alimentonan basico.

            Como compania nacional di telecomunicacion, SETAR ta duna bek na comunidad y nos mascotanan cu e meta semper pa aporta na haci un diferencia y yuda realisa cada meta.