Seleccion Femenino di Futbol Aruba preparando pa Concacaf y Women’s World Cup Qualifiers 22025-2026

Team Aruba ta hunga otro siman

ORANJESTAD (AAN) Den entrevista cu Matutino DIARIO, Michelle Every, miembro di e directiva di AVB (Aruba Voetball Bond), seleccion di damas, a duna di conoce cu e seleccion ta den preparacion pa 2025 y 2026, cu Concacaf y Women’s World Cup Qualifiers, ta bay tuma lugar pa prome biaha na Aruba.

   “E lo ta un momento historico pasobra pa prome biaha, Aruba ta anfitrion di e wega aki. E wega lo tuma lugar Diabierna otro siman, na Compleho Deportivo Guillermo Prospero Trinidad”, Michelle a duna di conoce.

   El a bisa cu Aruba a cay den un grupo unda e lo hunga contra Panama, Cuba y Curacao, St. Kitts & Nevis.

   “Nan ta bay hunga un total di seis wega unda nan tin cu califica pa esun cu tin e punto mas halto y esaki ta un oportunidad pa yega e Copa Mundial na Brasil na aña 2027.  Nan a caba di haci un training tambe na Hulanda, hunto cu nan coachnan. Practicamente nos tin un grupo na Hulanda y un grupo aki na Aruba y leu leu nan ta topa pa entrena hunto y prepara pa e wega”, Michelle a splica.

   E damanan ta hopi entusiasma y nan a yega di ta campeon un biaha na 2021 cu U15, y practicamente full e team ta e mesun damanan aki. “Nos tin tur confianza cu nan ta bay logra, pasobra nan ta capaz”, Michelle a expresa.

   Michelle ta haci un yamado na henter pueblo di Aruba pa para tras di e seleccion di damas aki, pasobra nan ta capaz y nan ta bay logra.

Diabierna otro siman, e wega ta cuminza pa 8’or y lo tin un apertura chikito pa e damanan. “Lo inicia nos himno y e jingle di futbol cu a lanta ayera, y ta un momento pa Aruba haci loke sa haci, apoya y grita pa pone ambiente”, Michelle Every a relata.