Minister Wever:
ORANJESTAD (AAN): Despues cu durante un Openbaar Bijeenkomst den Parlamento recientemente minister di Economia y Finanzas Geoffrey Wever a menciona e incentivonan fiscal nobo cu ta e Ex Pat Regeling, e Begunstigend Beleid pa San Nicolas y Oranjestad, e Starters Regeling y actividadnan nobo pa Freezone di Aruba, el a duna un splicacion cortico di cada un di e puntonan.
Wever a indica cu e Expat Regeling conoci tambe como e ‘Fringe Benefits Regeling’ ta ora cu tin incentivonan pa dunadornan di trabao, caminda cu nan por duna nan empleadonan cierto beneficio na un forma fiscal eficiente of faborable.
Ehempelnan ta inclui ora cu bo kier duna e empleado un compensacion pa gastonan di auto, representacion of telefon.
“Esakinan tabata anticua y nos a modernisa esaki completamente, ahustando diferente suma cu un dunador di trabao por duna na su empleadonan”.
Den e structura aki a wordo incorpora tambe cu por duna un compensacion por ehempel pa gastonan di internet, cu antes no tabata por, segun e mandatario.
El a splica cu awendia dunadornan di trabao kier pa nan empleadonan ta conecta, unda cu por ehempel nan por traha for di otro caminda, por ehempel for di cas.
Segun Wever, ora cu un dunador di trabao duna su empleado un auto di trabao, e reglanan tabata stipula cu bo tin cu agrega 15% di e balor di catalogo di e auto riba e salario di e empleado.
Esaki a wordo amplia incluyendo tambe autonan hybrid y autonan electrico.
“Si por ehempel un dunador di trabao kier duna un auto electrico na su empleado, no ta agrega 15% sino 5%, pa asina nos yuda stimula e transicion di energia pa haci Aruba un pais mas limpi y menos dependiente di importacion di HFO”.
Ya caba Gobierno a dicidi cu ta bay haci e transicion di full e fleta di auto di Gobierno pa autonan electrico y di e forma aki nos ta stimula sector priva tambe pa sigui cu esaki, segun e minister, kende a sigui bisa cu ya caba e invoerrechten ta reduci pa vehiculonan electrico.
Wever a indica tambe cu asina tin diferente suma a wordo ahusta, manera por ehempel e sumanan duna pa desayuno, pa lunch of pa dinner.
Esaki ta conta tambe pa un vivienda cu un dunador di trabao por duna empleadonan.
Tambe a ahusta e suma di compensacion pa muda, esta ora cu por ehempel bo manda busca un empleado di pafo y por paga su gastonan, esaki por te cu 20 mil Florin, cu ta bay bao di e areglo den e intento pa sigui profesionaliza e economia di Aruba, pero tambe e ta un intento serio di parti di Gobierno pa stimula nos localnan cu ta studia afo pa bin bek Aruba y traha akinan.
