Diego de Cuba di STA ta mustra cu...
ORANJESTAD (AAN): Diego De Cuba Presidente di Sindicato STA ta splica cu pa 2024 WAB, cu ta e organisacion di contratistanan, ta wak basta reto.
Ta mirando caba cu proyectonan grandi den construccion ta disminuyendo. "Nos sa cu tin un proyecto grandi andando ainda na aeropuerto, cu nos ta kere aki dos of tres aña esey lo mester ta cla. Un parti mester keda cla e aña aki caba".
De Cuba a remarca cu ta motibo di preocupacion. E sector di construccion lo bay enfrenta bastante reto na 2024 y tambe mirando e echo cu e aña aki lo mester bay inicia un negociacion nobo cu directiva di WAB, pa e companianan cu ta resorta bao di dje, cual ta hopi y STA ta representa casi tur, a indica.
Diego de Cuba a sigui bisa cu e bolo cu tin den construccion a 'shrink'. Den pasado a wak kico a sosode y semper STA ta stress y suplica pa duna companianan estatal proyectonan grandi cu tin ariba pais Aruba. Tin biaha nan ta bisa si, pero ora nan ta haci oferta, nan ta bid mas halto cu e otro companianan.
Pero a ripara cu y experiencia a mustra cu "lo barato sale caro". Y esaki a pasa diferente biaha cu diferente proyecto. Tin hopi situacion y pruebanan cu por trece dilanti caminda ta bisa, miho paga un tiki mas y haya un trabao cla y 100 porciento haci, a expresa.
Aworaki ta bay inicia e negociacion cu e hendenan di WAB y lo bay haya sa kico berdaderamente tin pa locual ta trata existencia di e companianan aki.
A wak rond hopi compania di construccion cu ta lanta aki y aya, pero nan ta lanta un tempo y disparce, a bisa.
E problema den construccion no ta di awo. For di aña 1986, cu Aruba a drenta Status Aparte caba ta confrontando cu problemanan den construccion. Si analisa tur e construccionnan cu ta tumando lugar aworaki na Aruba ta keda sorprendi di mira cuanto compania stranhero ta trahando den e construccionnan aki y ta di lamenta, a enfatisa.
De Cuba a splica tambe cu STA ta desea di mira cambio den esey. E ta kere cu gobierno di Aruba lo mester bay pone mas atencion riba e parti aki pasobra aki un tempo ta bay haya cu 500 pa 800 mama cu tata di famia ariba caya pa motibo cu e companianan grandi aki pocopoco lo disparce.
Esaki, Sindicato STA kier purba evita conhuntamente cu e directiva di WAB.
