ORANJESTAD (AAN): “Nos tur ta disfrutando di e dushi temporada di carnaval y gran mayoria di e poblacion ta atende e actividadnan di carnaval.
Sinembargo, mi kier a trece dilanti un punto hopi importante pa loke ta cuido di nos muchanan durante di e temporada di carnaval”, asina Parlamentario di Fraccion di MEP, Ricky Hoek a expresa.
"Durante e temporada aki, mi ta haci un yamada na tur mayor cu tin yiu chikito, incluyendo babynan, pa mantene nan na cas. Aunke tin posibilidad cu ta paradanan of actividad pa mucha, mi ta pidi pa nan no keda mucho rato den solo, y pa no keda cerca di luga unda por tin zonido fuerte. Tambe, pa evita mucha ta den aglomeracion y si nan ta hopi chikito, mi ta yama atencion pa keda na cas cu nan," Hoek a enfatisa.
E parlamentario ta kere tambe cu si tin deseo pa participa den e actividadnan di carnaval, tin algun crèche cu por tuma cuido di nos yiu, of por puntra un famia of amistad confiabel pa wak pa e muchanan.
“Por fabor, ban cuida nos muchanan. Ban tene e cuido di nos muchanan conscientemente pa proteha nan oido, proteha nan cerebro, nan cuero di solo cayente y tambe pa nos yiunan tin un crecemento saludabel”, a remarca.
Hopi ta atende e eventonan di carnaval y tin organisacionnan den comunidad cu por duna informacion mas detaya tocante cuido, specificamente pa nos yiu chikito durante e periodo aki.
Hoek a enfatisa riba e importancia di pone atencion na e yiu chikito ora nan ta disfruta di e actividad, tene cuenta cu tur aspecto manera solo, cuminda, hidratacion, zonido, calor, entre otro, cu por influencia nan bienestar.
Parlamentario Ricky Hoek a finalisa deseando un dushi temporada di carnaval na henter comunidad.
==
