Jose Maria Perez, General Manager:
ORANJESTAD (AAN) E General Manager di Secrets Baby Beach Aruba Resort, Jose Maria Perez de Ureta, den entrevista cu Matutino DIARIO a aclarea cu e hotel aki no tin un desaroyo den fase, sino cu e ta un continuidad, kiermen e ta sigui, e no ta para.
“Nos a caba e prome 304 habitacion cu ta esnan cu nos tin actualmente habri, y aworaki mes nos ta siguiendo cu henter e proyecto. Aworaki mes e SPA ta den construccion, e parti di e cabinanan ta wordo amplia, y tambe e parti habitacional. Nos no ta para cu e proyecto aki (el a reitera) te ora e finaliza”, Perez a señala.
Tocante cierto malcontento cu algun ambientalista tin cu e guestnan ta uzando e playa hopi, señor Jose Maria Perez a indica cu e huesped Mericano ta uno cu gusta hopi mas ta den pool cu riba playa. “Pero ta berdad cu Aruba ta un lugar hopi safe, y e turista Mericano ta sinti su mes manera den su cas. Nan ta huur vehiculo, ta gusta cana den tur e isla, y bishita tur e playanan; no solamente Baby Beach. De hecho, mi tabata papiando awe cu algun huesped y nan tabata bayendo Arashi. Nan kier a huur un auto y mi a bisa nan cu e bahada di solo eynan ta un beyeza extraordinario. Pues, hopi di nos guestnan ta pasa nan dia den pool, pero tambe nos ta duna un servicio chikito riba beach, den cual nos ta duna nan algun stoel di beach, algun serbete, refresco y awa pa nan ta comodo riba beach”, señor Jose Maria Perez, General Manager, a bisa finalmente.
