Miembro di Parlamento mester refleha e balor mas halto di comunidad - Trahadornan di Ley mester refleha e moral mas halto di e pais - Ley di Screening mester pasa awor pa restaura honor di Parlamento
ORANJESTAD(AAN)- Awe ta bira un dia di importancia pa Parlamento di Aruba, debi na e hecho cu contenido ta wordo duna na e resultado di eleccion na e pais.
Pa Aruba yega na e momento cu personanan cu ta bay ocupa un lugar den e gobernacion ehecutivo (Conseho di Ministro) di Aruba ta despedi di Parlamento, Aruba a pasa den lama bruto cu a wordo ocasiona dor di partido AVP, cu a trapa riba e moral di Aruba dor di exigi pa Benny Sevinger como preso wordo eligi como Miembro di Parlamento di Aruba.
E proceso electoral na Aruba tabata carga pa desaroyonan cu a mishi directamente cu e base legal y moral di Aruba, cu awe tin un Parlamento historico cu ta un berguensa pa Aruba debi na e presencia di Benny Sevinger den e representacion di Pueblo.
Na e momentonan aki Benny Sevinger lo no por bira Ministro pa e hecho cu e no ta den prison pasobra su detencion preventivo a wordo suspendi mientras Husticia ta prepara pa su caso bini dilanti den sala di Corte.
No ta solamente Fiscal y Huez a atende cu e estadia di Benny Sevinger den prison durante e detencion preventivo. E abogado di Benny Sevinger publicamente a bisa cu por asumi cu algo a pasa den e Caso Avestruz pero cu Benny Sevinger a bira victima di hende cu a uza su persona.
E declaracion di e abogado di Benny Sevinger a marca historia, cu tambe a wordo marca pa sentencianan di Huez den casonan cu AVP a hiba Corte pero a dal e partido AVP, a base di veredictonan di Huez.
Ora AVP a bay contra di e hecho cu tur informacion di votadornan cu tabata parti di e Registro di Eleccion no a wordo entrega na AVP, Huez a mustra cu AVP no por haya tur informacion pasobra AVP mes a declara cu e informacion di votadornan ta wordo uza pa bay busca votadornan cu no a bay vota pa hiba nan urna electoral.
Pues aki ta trata di un violacion di e caracter secreto di eleccion na Aruba, ya cu presion ta wordo poni riba un ciudadano pa bay vota manera a bini dilanti den Corte di Husticia.
Despues Huez a bolbe presenta sentencia contra AVP, cu a presenta cu portret di formulario di voto cu a wordo yena dor di ciudadano den sala di Corte. Na e ocasion aki Huez a papia di un violacion di ley electoral di AVP cu ta castigabel pero cu te ainda no ta wordo trata dor di Ministerio Publico.
E proceso electoral ta conclui ora Parlamento aproba entrada di Miembronan di Parlamento cu mester reemplasa e personanan cu lo bay fungi como Ministro y cu lo mester huramenta proximamente como miembro di Conseho di Ministro.
Por bisa awe e caracter transitorio di e representacion den Parlamento ta conclui, loke ta nifica cu awe porta ta habri pa Parlamento cuminsa cu su trabou.
E prome accion di Parlamento mester ta pa pasa un Ley cu ta exigi screening di Miembro di Parlamento loke lo mester tin como resultado cu den Parlamento e moral di e Pueblo di Aruba ta wordo respeta.
Mescos cu un Arubiano no por haya trabou pafor di Parlamento pasobra su estadia den prison a wordo suspendi loke ta haci cu e ta keda acusado den un caso criminal, Benny Sevinger tampoco por ta parti di Parlamento, cu mester refleha e cara y moral di Aruba.
Parlamento di Aruba ta encarga cu traha y sostena e leynan di Aruba, cu ta refleha e moral di Aruba tambe y no por permiti cu e colegio legislativo di Aruba tin un Miembro cu ta presente pasobra su estadia di prison a wordo suspendi mientras Husticia ta sigui traha riba e caso penal di entre otro corupcion.
Cu urgencia mester atende e ley cu ta haci cu mescos cu ta e caso cu Ministronan, Miembronan di Parlamento ta pasa screening, investigacion cu ta determina si nan por wordo considera representante di Aruba y e balornan di Pueblo di Aruba.
