Mundo politico y gremionan mester duna mas atencion na realidad - *Recreo na beach y deporte acuatico pa poblacion local y turista - *Loke awe ta atraccion turistico por bira fuente di malesa peligroso
ORANJESTAD (AAN) — Un inventarisacion y analisis di topiconan cu ta haya atencion, ta crea preocupacion serio.
Atencion di e Arubiano na demasiado ocasion ta wordo fiha riba asuntonan superficial mientras cu desaroyonan preocupante cu lo ocasiona cambio den e forma directo di bida na Aruba, no ta bini na discusion.
Kico esaki ta nifica por nota den e atraccionnan cu e beachnan di Aruba tin pa poblacion local y pa turista.
E beachnan di Aruba ta un rikesa natural pero ta naturalesa awe ta exigi hende pa cuminsa dedica atencion na e realidad riba cual un parti grandi di economia, entrada financiero y bida di e Arubiano ta basa.
Cu clima ta cambiando, tur hende ta na haltura. E calor tremendo, interumpi pa yobidanan pisa, ta papia un idioma cla.
E cambio di clima aki ta bay afecta loke awe ta tuma pa garantisa y hasta lo tin influencia directo riba nos costumbernan.
Lama ta importante pa e Arubiano. Lama caminda e cambionan climatologico lo tin efecto directo y tambe e beachnan caminda solo por ehempel por bira peliger mas grandi pa hende.
Uno di e enfermedadnan cu ta avansa na e momentonan aki, ta cancer di cuero cu ta wordo ocasiona tambe dor di un di e pasatiempo favorito di e Arubiano y e turista cu ta bishita Aruba.
Drumi den solo. Disfruta di beach ta un recreo cu Aruba no por scrap for di su lista.
E radiocion di solo ta bira cada rato mas intenso y cu esaki tambe peligronan cu solo ta ocasiona.
Solo como fuente di calor ta bira un problema serio pa hende, cu pa scapa di calor ta drenta lama. Hende ta bay landa den lama, cu ya a cuminsa cambio dor di e forma cu sushi cu ta wordo depone den lama, ta causa problema.
Pa keda un rato na e base di e problema. Si no bini cambio, e beachnan lo cuminsa bira mas chikito mientras e nivel di awa ta subi.
E calidad di awa di lama lo cambia pa afecta hende pero hasta sistemanan cu ta wordo uza pa depone awa sushi den oceanonan maltrata.
Mundialmente personanan cu ta practica deporte aquatico, ta tene nan mes ocupa cu loke futuro por trece pa e persona cu kier practica scuba diving, windsurf, ski, rema den e olanan cu awe hende kier domina.
Cambionan a cuminsa presenta nan mes caba na un mundo, cu mester cuminsa discuti e futuro di hende den naturalesa cu a wordo y ta wordo abusa.
E prijs cu hende ta paga pa maltrata naturalesa, ya ta hopi halto.
Calor inmenso ta afecta personanan cu ta sufri cu presion halto di sanger por ehempel. Personanan cu condicionnan di pulmon y curazon tambe ta riba e lista directo di peliger.
Hende tin un tarea grandi awe pa preveni un futuro cercano desastroso. Sinembargo, hende cu awe tin tanto posibilidad a base di conocemento avansa, ta prefera aparentemente di dera cabez den santo, cu ta bira cayente na beachnan cu ta sinti e peligro yega mas cerca.
Ora nos analisa nos prioridadnan pa entrega na e generacionnan nobo un mundo den cual nan por bira adulto, nos mester conclui cu awor mundo politico y tur gremio, tur grupo den comunidad y hasta tur famia mester uni den e proposito grandi pa scapa nos porvenir, nos nivel di bida cu ta na peliger si nos sigui destrui loke naturalesa a entrega nos!
