Scol EPB lo cuminza cu les construccion en general nivel halto pa genera mas interes cerca alumnonan

Erwin Lopez, director:

ORANJESTAD (AAN) – Den un entrevista cu DIARIO, señor Erwin Lopez, Director di EPB Oranjestad, a menciona cu tin un problema, den sentido cu e hobennan no ta mucho interesa pa studia riba tereno di construccion en general.

Lopes a menciona cu den pasado a yega di papia cu WAP, cu a keda di bin cu programanan pa promove e tipo di trabao aki, pero esaki nunca a cristaliza.

El a menciona cu tin un departamento di construccion na scol, y e aña aki ta bay habri’e den un bachi nobo cu ta mas den construccion general. Antes tabata mas tanto carpinteria: traha kozijn, cosnan di palo, pero awendia esaki a cambia. E companianan eyfo mester di hende pa pega bloki, traha e tecnicanan nobo cu tin, y riba esey scol ta bay enfoca aworaki.

Señor Erwin Lopez a comenta cu pa mayoria di Arubiano, e trabao di construccion ta duro. El a duna di conoce cu por wak aworaki un cambio unda cu trabaonan no popular ta bayendo pa hendenan di afo, y e Arubianonan ta gusta scoge otro trabao.

Mientras tanto, loke ta pegamento di tehels, por ehemplo, ta paga masha bon mes mescos cu pegamento di bloki, ta un tiki pisa y ta rekeri di hopi disciplina tambe. Tin yen di rekisito pa haci e tipo di trabaonan aki, manera no meldziek, por ehemplo.

Na scol tin enseñanza pa otro trabaonan cu tambe ta popular. Si bay den Horeca e persona ta traha paden, no ta traha den solo, por traha administratie. Pues, tin di haber hopi na unda e persona ta traha. “Hendenan cu ta traha den construccion ta den solo tur dia. E ta un trabao cu hopi stof y no ta wordo hopi aprecia. Si bo bay traha como waiter, por ehemplo, bo ta gana bon tips si bo ta hopi servicial, bo ta traha den airco hopi biaha, of den fresco”, director di EPB Oranjestad a indica.

El a agrega cu te recientemente, scol tabata duna hopi les di carpinteria, pega bloki, pero aworaki nan lo dirigi mas riba construccion general: traha fundeshi, traha dak, pega bloki, etc., cu antes no tabata e enfoke. E enfoke tabata hopi riba carpinteria, Lopes a reitera.

“Mientras tanto awendia casi tur kozijn y porta ta bin di aluminio. E demanda no ta grandi mas pa hendenan cu ta traha cu palo, pero mas bien pa e construccion general. Traha fundeshi, mara hero, traha stelling, ta e cosnan cu ta wordo pidi actualmente”, Lopez a señala.

Pa e aña aki scol ta purba yega na 20 mucha den e ramo aki, pasobra esaki ta nobo. Den pasado semper tabata tin entre 15 pa 20 alumno pero scol ta bay purba hisa e cantidad y e nivel tambe ta bay subi pa eleva e educacion, pero tambe pa wak si  por haya mas mucha pa e ramo aki, segun director Erwin Lopez.