ORANJESTAD (AAN) – Camara di Comercio y Industria di Aruba (KvK), Aruba Trade & Industry Association (ATIA) y Comerciantenan Uni Aruba (CUA),
den conferencia di prensa a duna un splicacion extenso, riba locual ta un aumento di prijs sin precedente riba tur producto, (alimenticio y otronan) cu nos poblacion por spera.
Francis Saladin di CUA (Comerciantenan Uni Aruba) a expresa cu nan no ta e unico empresanan cu ta buscando alternativa pa importa y distribui productonan na negoshinan pa nan consumidor, pero esaki ta un situacion mundial, y tur pais, incluyendo China, tin e mesun problema aki. El a señala cu no tin di haber cu e distancia cu tin entre e pais exportador y esnan cu ta importa e productonan. Kizas productonan importa for di paisnan cu ta mas cerca di Aruba, por ehemplo, lo por sali un tiki mas barata, pero tambe por resulta mas caro, y ademas nan no tin e capacidad di cubri e necesidadnan di tur e paisnan importado den nos region.
Incluso un di su companianan via un email a mustra un lista di producto cu ta “auto-stock”. E container ta 60% yen so, pues tin biaha nan no por haya e productonan mes.
KvK, ATIA y CUA ta mira e situacion como un cataclismo perfecto unda tin productonan den scarcedad, prijsnan halto, costo di flete halto, combina cu gobierno ta cobra invoerrechten riba e flete ta dal nan cu e doble BBO.
E “tempo aya” nan a discuti tocante BBO, cu si nan tine separa for di e prijs, aworaki no tabata asina pisa. “Si gobierno ta bisa, nos ta bay yuda pueblo, nos ta bay baha BBO na 5% envez di 6%, mirando cu den e diferencia di loke nan ta ganando toch nan no ta perde, pero ta keda mescos, e pueblo por wordo alivia”, Francis Saladin a señala.
E ora ey e comerciantenan ta djis bay den nan sistema, cambie di 6% pa 5% sin nodi cambia prijs riba miles di producto. “Pero mirando e situacion, alomenos un manera facil cu gobierno por yuda pueblo, ta cambia ‘at least’ e flete y uza e ‘flete pre-covid’. Ban cuminza na esey. Ban cuminza unda Douane ta cobra envoerrechten riba e flete na e prijs cu e tabata tin prome cu covid-19. Pues, e 4 mil dollar envez di e 20 mil dollar di actualmente. Asina ey bo ta yuda e pueblo cu e prijsnan” Saladin a acentua.
ATIA, KvK y CUA ta compronde completamente e situacion financiero di gobierno y cu nan mester di fondonan, pero nan ta kere cu ta dificil pa impone tur esaki riba nos pueblo, mirando cu prijsnan ta subiendo desproporcionalmente.
“Por ehemplo, si gobierno ta gana 800 dollar riba un container, door di invoerrechten e ta gana 4 mil dollar. Ok, envez di bo gana cinco biaha riba dje, gana dos biaha. Asina mes bo por gana mas cu prome cu covid pa alomenos alivia e pueblo un poco pa cu bo prijsnan”, e comerciante a splica.
“Nos no ta mira cu e situacion aki lo normaliza pa resto di e aña aki, envez di normaliza ta bay bira peor prome; y por ta, prome cu mitad di otro aña, e situacion ta cuminza normaliza pero no ta premira cu e lo yega bek na loke tabata antes. Nos tur sa cu un bez cu prijsnan subi e companianan no ta prepara pa baha prijs tampoco” Francis Saladin a señala.
