Santa Rosa a cuminza for di 2014 cu concientizacion riba importancia di abeha pa produccion di cuminda

Nathalie Maduro, directora di LVV-Santa Rosa:

*A crea un habitat na Santa Rosa mes 

ORANJESTAD (AAN) – Directora di Departamento di Agricultura, Cria y Pesca (LVV-Santa Rosa), señora Nathalie Maduro, den entrevista cu Matutino DIARIO, a toca e tema di Apicultura, cu ta e actividad dedica na e crianza y cuido di abehanan, y con y pakico a crea un habitat pa abehanan na Santa Rosa.

Nathalie Maduro a splica cu na aña 2014 caba, Santa Rosa a cuminza cu concientizacion riba e importancia di e abeha pa loke ta trata e produccion di cuminda. Loke a stimula LVV e tempo ey, ta cu nan tabata haya hopi cunukero cu tabata bishita Santa Rosa cu e pregunta “mi ta plantando suficiente fruta cu berdura, nan ta floria, pero na momento cu nan tin cu cuminza produci fruta, e flornan ta cay”.

“Ora cu nos a bay haci un sondeo nos a cuminza tuma nota cu tin hopi cas awendia, cu tin bunita hofi cu flor, pero bo ta haya hopi di nan cu ta spuit veneno, contra insecto. Logicamente, ora bo tin un hofi cu flor, bo ta atrae diferente tipo di insecto incluyendo abeha”, Nathalie Maduro a splica.

El a sigui bisa cu abeha ta un insecto cu ta biaha hopi leu, pa nan yega na nan cuminda, pa nan por abastece nan reina, cu suficiente cuminda pa dia.

“Anto, kico nos a haci? Nos a cuminza cu e seccion di Apicultura den Santa Rosa mes, nos tabata ofrece e servicionan di bay unda tabata tin problema cu abeha, un colega di nos tabata bay busca e abehanan y trece nan na un habitat cu nos a crea den Santa Rosa”, señora Maduro a duna di conoce.

Apart di esey, durante e programanan di Santa Rosa den television, nan tabata duna informacion referente na e importancia di abeha, no solamente mira e importancia di e honey, pero mira e importancia di conserva y proteha nos abehanan local.

“Na momento cu tin temporada di secura, con bo por yuda nan pa pone awa, ki tipo di flornan nan ta gusta, cu bo por planta den bo cura, of si bo tin e matanan planta den bo cura pa tene cuenta, cu no ta pasobra bo ta weita un grupo di abeha, por ehemplo den bo mata di wayaca, esey kiermen cu nan ta forma un peliger y cu nan tey pa ataca bo. Simplemente, nan a yega na un mata cu tin e flor, y nan ta haciendo nan trabao”, Nathalie Maduro a detaya.