Minister Geoffrey Wever
ORANJESTAD (AAN): E siman aki Minister di Finansa, Asunto Economico y Sector Primario, mr. Geoffrey Wever, ta anuncia cu Gobierno di Aruba a sigura un financiamento di $151.200 di Hulanda via e Tijdelijke Werkorganizatie (TWO) pa desaroyo integral di un maneho pa un Industria Creativo en Cultural (CCI), cu lo inclui un vision strategico, un plan di accion y un pakete di incentivo.
E Orange Economy, reconoci dede 2018 como un sector prometedor cu gran potencial economico y cultural, ta ocupa un lugar central den e strategia di diversificacion economico di Aruba. Segun minister Wever, “E sector creativo y cultural ta un motor di innovacion y crecemento pa e economia di nos isla. Cu e apoyo financiero di Hulanda, nos ta bay formalisa un maneho coherente cu lo crea un base firme pa crecemento sostenibel di e sector y contribui na diversificacion di economia di Aruba.”
Minister Wever ta contento cu Hulanda ta kere den e vision di Ministerio di Economia y ta contribui activamente. Minister ta enfatisa cu e proyecto ta parti di un esfuerso mas amplio pa fortalece e base economico di Aruba y diversificacion di nos economia: “Nos ta traha pa crea un ambiente cu ta stimula talento y creatividad, cu ta habri porta pa mas oportunidad di trabao, innovacion y bienestar pa nos ciudadanonan.”
