ORANJESTAD (AAN)- Un boletin cu DIARIO a ricibi for di Departamento di Salubridad Publico UO G&Gz di Curacao, cu ta indica den nos isla ruman, actualmente ta circula influenza y Covid pareu.
Ministerio di Salubridad, Medio Ambiente y Naturaleza, ta urgi un y tur pa tuma nota di e siguiente recomendacionnan:
(1) Actualmente na Curacao ta circula influenza y COVID y tur dos ta pega via di rosea y man sushi.
(2) Cercania di menos di dos meter y mas largo cu 15 minuut por causa contagio. No ta tur hende ta haya sintoma, pero bo por pega otro aunke bo no tin sintoma.
(3) Mester haci extra esfuerzo pa no hiba e virus cerca hende cu inmunidad mas fragil, manera hendenan di edad grandi, hendenan cu malesa cronico y hende muher na estado.
(4) Si abo ta bira malo, proteha otronan!
Proteccion: Tapaboca ta importante pa disminui e chens di pasa e virus pa otronan. Esaki ta funciona manera un filter cu ta fangu virusnan cu por ta saliendo for di bo boca y nanishi. Bisti tapaboca ora: (*) Ta den espacio chikito y cera, entre otro, den bus. (*) Ta den espacio caminda lo por tin hende malo of fragil, entre otro den botica, consultorio di docter, hospital, cas di grandinan. (*) Bo ta bishita bo grandinan na cas. (*) Bo tin verkoud bisti un tapa boca ora bo ta hopi cerca di hende.
(*) E tapaboca mester tapa for di nanishi te cu cachete, sino e no ta haci su trabao.
Circulacion di aire: Den auto purba di uza menos airco y mas bentana habri, hasta si ya caba ta usando tapaboca. (*) Si bo ta bay topa famia/amigo haci esaki den aire liber of un lugar cu bon circulacion di aire fresco. (*) Percura pa ora ta cuida hende malo, bentana ta habri pa aire circula.
Higiena: Preferible uza awa y habon pa tene man limpi, ora no por uza gel cu alcohol (mas cu 60%). (*) Man limpi ta importante ora ta cuida hende malo pa abo no pega. (*) Man limpi ta importante pa abo no hiba cu trece e virusnan via man sushi pa otronan.
Selftest pa Covid: Pa haci uso di un selftest pa detecta Covid si bo tin sintoma di verkoud of malo di barica. (*) Selftest ta obtenible na botica. (*) E selftest por sali negativo e prome dia di sintoma mientras cu toch bo tin Covid. Pa sigur ta bon pa ripiti e test e siguiente dia.
Consulta docter na tempo: Yama e oficina di bo docter di cas mesora cu sa e resultado positivo di e test. Den caso bo bira mas malo e ta na haltura caba y por evalua y guia e situacion miho.
(*) No tarda pa yama un docter ora e persona cuminza sinti mas malo.
Ta nos cada un su responsabilidad di proteha nos mes, nos famia, nos sernan keri, coleganan y nos comunidad completo.
