Amyna Kelly Trahado Preventivo di FADA:
ORANJESTAD (AAN)- Amyna Kelly, Trahador Preventivo di Fundacion Anti Droga Aruba (FADA), a splica den entrevista cu DIARIO cu FADA a lanza un campaña super grandi, cu ta esun di AMIGO DIDI.
“Sigur un biaha mas nos tey. Mirando cu tur aña nos di FADA, sigur nos ta para pa e proyecto Amigo Didi y tin temporada cu nos ta enfoca riba esaki, y e temporada di fiesta ta yegando cual ta December, uno cu e aña aki nos no kier a laga afo; nos ta bay lanza un video super grandi unda cu esaki lo tin un impacto grandi riba comunidad, mirando e ultimo videonan cu nos a lanza.
Den e video aki bo ta wak unda tin un grupo di amigo; den e caso aki nan ta bay sali y ta bay haci uso di alcohol, despues nan ta bay maneha bao influencia di alcohol, na unda cu un di nan amigonan ta fayece. E ta un caso cu por, of ta pasa, normalmente ora ta stuur auto bao influencia di alcohol, y hopi biaha ta pasa cu e persona sinta na banda ta fayece, manera den e video aki, unda bo ta bay mira esaki un biaha mas”, Amyna Kelly a señala.
El a informa tambe cu e video lo wordo pasa den tur e plataformanan y rednan social digital, y lo pasa na television.
Kelly a expresa palabranan di gradicimento na KPA, Brandweer, Ambulance, Dr. Taxier, Francis Rodriguez, e actornan, entre otro. El a subraya cu FADA tin un trabao super grandi y druk FADA ta den tur scol, dunando charlanan tocante alcohol, dunando mas informacion posible, mirando cu e temporada di fiesta ta yegando.
El a reitera cu si bo ta bay haci uso di alcohol corda semper riba bo amigo DIDI. “Semper tin un persona cu por stuur pa bo y corda cu na cas tin un famia cu ta warda bo y tambe cu no pensa solamente riba bo mes, pero pensa riba e otronan. Mi ta spera cu e video cae na agrado di comunidad completo y cu e mensahe tras di e video aki por yega na un y tur”, Amyna Kelly, Trahador Preventivo di FADA a conclui.
