Ruman di Minister Glenbert Croes lo sali for di Raad di RdA pa evita conflicto di interes

ORANJESTAD (AAN):  Ursell Arends, lider di partido RAIZ, proximo Minister y Vicepresidente di Gabinete Wever-Croes II,

a indica cu como Minister di Integridad den e proximo gobierno ta bay tin hermentnan adecua y nan a cuminsa caba cu e asina yama Bureau Integriteit y cu e Corporate Governance Code.

Tur esakinan ta bay percura pa yuda implementa e reglanan di integridad y ehecuta esakinan den e proximo 4 añanan, a remarca.

El a enfatisa cu pa loke ta e lazonan familiar den e gabinete, e no ta mira cu esaki lo por ta un obstaculo pa mantene e integridad den gobierno.

Arends a bisa cu algo lo mester pasa pa pon'e cambia di opinion, pero desde cu a cuminsa negocia pa yega na un gobierno nobo, nan a hacie di un forma armonioso, den confiansa y total transparencia cu otro.

Ursell Arends a remarca cu e ta convenci cu e manera cu nan a priminti di implementa un gobierno stabil pa e proximo 4 añanan, nan tur lo atene nan mes na e reglanan di bon gobernacion, integridad y transparencia. Esey ta algo cu e partnernan den coalicion a bay di acuerdo cu ne for di e prome dia y nan lo percura pa atene nan mes na esaki tambe.

Prome Minister Evelyn Wever-Croes a agrega pa loke ta RdA, e palabracion ta cu e ruman di Minister Glenbert Croes cu a sirbi'e durante cu e tabata minister, el a sirbi hopi bon den su funcion di presidente di e raad.

Awor, Sr. Croes ta bay baha tambe pa evita e mesun tipo di relacion cu por crea conflicto di interes.