ORANJESTAD (AAN): Prome Minister Evelyn Wever-Croes a referi na cierto interogantenan cu a bin relaciona cu e nombracion di Endy Croes como Minister di Educacion.
A cuestiona entre otro cu si akinan tambe tin conflicto di interes y a referi na algun caso pendiente entre Sr. Croes y Ernst & Young.
E mandatario a splica cu tur cos a wordo mira y a mira tambe cu no tin nada pendiente mas entre Sr. Endy Croes y Lotto pa Deporte di e tempo aya. Aworaki den e trabao como parlamentario, specialmente e ley cu a pasa ultimo, tabata tin cierto contactonan y e ta mira cu ta purba di yega na algo constructivo.
Wever-Croes a reitera cu a constata cu no tin conflicto, speculacion of conflicto di interes den e caso di Endy Croes, pero den e caso di Rocco Tjon esey si tabata e caso.
El a remarca cu nunca el a pone algun candidato como reserva pa pasa screening. Locual si a descarta ta cu por tabata tin cualkier conflicto di interes entre Endy Croes cu deporte. A purba yega na un reparticion di e carteranan na e forma mas mihor cu ta posibel y den bon cooperacion.
Durante e reunionnan cu stakeholders tanto MEP como RAIZ a invita mas hende pa ta presente tambe dependiendo di nan experticio. Tin parlamentarionan cu tambe a asisti na e reunionnan pasobra e ta bay yuda nan tambe den nan trabao den parlamento, Wever-Croes a señala.
