Ruben L Garcia ta naci dia 30 di October 1952 y ta procedente di e bario di Dakota.
Ruben Garcia ta conoci tambe pa Ruben “ Scorpio “ Garcia. Un apodo of nomber artistico cu ta ilustra su signo zodiacal cu ta Scorpio.
Dia 1 di Juni aña 1970 Ruben Garcia ta cuminsa cu carera como un operador di sistema di radio den studio di Radio Kelkboom situa e tempo ey den Emanstraat .Un dia cu tabata falta un locutor na e radio y Ruben Garcia ta tuma e reto pa asina locuta e momento ey na radio. Esaki a cai na agrado di e oyetenan y tambe gerencia di Radio Kelkboom. Gerencia di Radio Kelkboom ta duna Ruben oportunidad pa sigui presenta na radio. Un programacion cu tabata yama” Scorpio pa teenagers” cu tabata tur atardi den siman di 5:30 pa 6:00 pm.
Ruben Garcia ta cuminsa crece den popularidad y na aña 1971 Ruben Garcia hunto cu Harold Helder ta participa den e competencia di Prins y Pancho di Carnaval y a sali ganador di e competencia. Prins Disc (Harold) y Pancho Jockey ( Ruben).
Ruben Garcia ta sigui haya mas confiansa den su mes y ta crea Scorpio’s Discoteque cu a presenta musica moderno y popular di Disco, Rock Roll, Soul na su publico.
Desde aña 1971 Ruben Garcia a fungi como Maestro di Ceremonia pa diferente festival, certamen di beyesa y presentacionnan oficial y actonan protocolario oficial di Gobierno di Aruba.
Na 1976 Ruben Garcia ta cambia di frecuencia di radio y ta cuminsa locuta na Radio Voz di Aruba y ta keda locuta ariba e frecuencia 13.20 am te cu na aña 1989.
Na 1978 Ruben Garcia ta contrae matrimonio cu Teresa Marchena y ta haya 2 yiu muher.
Na 1989 Ruben ta cuminsa locuta na Canal 90 (frecuencia di 89.9) y cu tabata pertenece na e mes un Radio Voz di Aruba.
Durante e periodo di Radio Voz di Aruba y Radio Canal 90 e popularidad di Ruben a crece masha hopi mes.
Ruben Garcia ta e creador di e programa Disco Sensation, pero tambe e programa di Carnaval mas popular na radio durante su periodo cu tabata Aki Aya. Ta bon pa menciona cu Ruben Garcia hunto Roberto Geerman d.f.m.ta e creador di e asina yama Road Jam pa e Roadmarch di Carnaval mas toca durante e dos ultimo paradanan di Carnaval. Esaki a nace na aña 1987 durante e famoso Carnathon ariba Avenida 1390 cu tabata transmiti ariba ruta di di Carnaval.
Durante e temporada di Cuaresma Ruben Garcia hunto cu Roberto Geerman d.f.m.tabata conoci pa e Operativo SOS ( Samen op Stap) y tabata transmiti tur diadomingo di e periodo for di diferente beach na Aruba cu un participacion grandi di hende.
Desde 1981 Ruben Garcia ta bira promotor y ta logra trece diferente artista di fama mundial bin duna concierto na Aruba, entre otro UB 40.
Ruben Garcia tabata maestro di ceremonia, animador durante di concierto y Contest di Calypso y Roadmarch na diferente ocasion. Ruben Garcia tabata maestro di ceremonia na Curacao, Bonaire y Hulanda.
Na television 15 ATV tambe Ruben Garcia tabata masha popular cu su programa di Carnaval Riba Bao y e programa di Pasco “ E Regalo”
Ruben Garcia tambe tabata hopi popular pa su avisonan comercial na radio y na television manera esun di e tempo First National Bank cu interes nan cu ta subi y sigui subi. Tabata tin diferente empresa cu tabata usa e voz di Ruben Garcia como nan introduccion oficial na telefon.
Na 2002 Ruben Garcia ta drenta den servicio di e radio Magic Fm 96.5 na unda tambe a cosecha hopi exito.
Ruben Garcia actualmente tabata e director di Power FM 101.7
Na 2020 Ruben Garcia a cumpli 50 aña como animador, locutor y presentador den farandula na Aruba y a ricibi un plakaat di Gobierno di Aruba.
Durante pandemia di COVID-19 ( 2020-2021) Ruben Garcia tabata e motivador pa tuma e vacuna contra e malesa.
Dia 30 di October 2022 Ruben Garcia a cumpli 70 aña di edad y dia 3 di November 2022 Ruben Garcia a cera su wowo pa semper.
Un dato masha interesante tabata cu: Ruben Garcia a yega di wordo acerca pa subi lista di un partido politico.
Compila pa Roberto Croes
Nos Historia Nos Herencia
