Pius X School trahando na formacion di nos maestronan

Pius X School goes Italy.

ORANJESTAD (AAn): Dia 9 di October pasa un grupo di 18 maestro a yega fo’i Italia. Diez maestro di Pius X School, 2 trahado social di S.K.O.A, 5 maestra di scolnan primario cu ta alaves boluntarionan na Pius X School y un mayor boluntario di scol.

   Loke e biahe aki a encera: E grupo di Pius X School a bay Italia pa haci un investigacion riba e sistema di enseñanza di Italia, mas specifico na Soverato y con e scol(nan) ta anda cu inclusion den enseñansa primario regular. Maestronan a participa den forma di ‘jobshadowing’ y cabesante cu guia interno a haci curso riba e topico di ‘ASS’ tambe. Pius X School a traha hopi di cerca cu e organizacion ‘JUMP’ pa e experencia aki. 

   E scol cu nan a bishita yama Maria Ausiliatrice. Un scol priva dirigi pa monhanan cu ta un scol cuminsando for di scol preparatorio te cu anvansa. Cu ki meta e grupo aki a bay?

   E titulo di e proyecto den su totalidad yama ´No child left behind´.  E maestronan aki kier a experencia y investiga con un scol na Italia ta trata cu inclusion. Tur mucha tin derecho riba enseñansa, esaki ta igual den scolnan primario regular? Con ta anda cu muchanan cu tin un necesidad special? Con ta anda cu muchanan cu tin syndroom di e spectrum di autismo den un scol regular?

   Ki protocol scolnan na Italia ta usa? Con un maestro ta draai su dia? Kico ta nan pensamento? Kico Aruba por siña di e scolnan aki, pero tambe kico anos di Aruba por siñanan tambe. Intercambia conocimento y ‘best practices’. 

   Maria Ausiliatrice; un scol cu tin su seccion di scol preparatorio, scol basico y enseñansa avansa den un edificio. 

   E grupo cu ta duna les ta parti den tres seccion.

Seccion 1: nos soeurnan di antes, nan ta traha pa Senjor te ora nan curpa duna.

Seccion 2: ta e soeurnan studia cu a bay universidad.

E soeurnan no ta biba den combento sino na scol. 

Seccion 3: e maestronan cu no ta sur

Seccion 4: asistente di maestro

Seccion 5: voluntarionan 

   Hopi hende ta participa den e scol. Un aprecio ta bay hopi pa e mayornan y abuelonan cu ta sinti nan mes parti di e scol door cu nan ta haya e espacio pa participa activamente den e scol p.e. den e parti cultural.

   Con a sinti ora cu a drenta e scol: Ora nos a drenta e scol, nos a haya un flashback pasobra antes na Aruba nos tambe tabatin soeurnan na scol. Nos a keda impresiona cu nos por a bib’e un biaha. Nos a haya un bon ricibimento. Tin hopi diciplina, hopi respect y hopi amor pa cu e muchanan. Nos a ripara tambe cu tin un liña di desaroyo bon fiha. E muchanan ta cuminsa cu 6 luna na un forma di creche na e scol y ta keda te cu ora nan caba e scol avansa cual ta mas o menos 18 aña di edad. E italianonan ta aprecia masha hopi mes nan cultura y loke nan ta cultiva y produci p.e. bergamota, oleifi y almendra.

   Kico mas nan a haci: Nos no a keda solamente na jobshadowing sino nos a explora e pueblo di Soverato. Con nos a logra sa mas di e cultura di Soverato? Nos a bay intrevista ciudadanonan cu nos a topa ariba nos ruta. Nos a papia cu piscadonan, amanan di cas, negoshantenan, koki y tur hende tabata ancioso pa conta nos di tur cos di nan.

   Nan a conta nos over di nan simbolonan nacional di Soverato; e pisca chikitonan, e cabay di lama y e pica chillie cu ta tipico di nan.

   Den nos ora liber nos a sera conoci cu un Monasterio unda antes e monkenan tabata biba. Awor nan no tey mas pero si e Monasterio awo ta un centro di rehabilitacion pa drogadictonan. E esencia di e exito di e terapia ta e cantidad di tempo cu bo ta tuma tuma pa rehabilita. Con nan ta logr’e? E adictonan mes ta traha zorg pa e luga, pa e hardin, paden y pafo. Tur cos ta nechi. Na final di nan programa, e adictonan kier keda biba eynan. No tin subsidio pero hopi ayudo di misa y di pueblo den forma di cuminda y paña.

Nos a bishita e Botanical Garden di Soverato cu tabata un experiencia di naturalesa den su punto maximo. Nos a bishita Badolato un pueblito turistico den sero halto caminda nos a come cuminda tipico di Italia.

   Ken ta Erasmus+: E proyecto ta worde subsidia pa Erasmus+. Erasmus+ ta un organizacion subsidia pa Union Europeo cu ta brinda e oportunidad pa entre otro scolnan di diferente pais den Europa haci intercambio educativo. Pa asina engrandece  conocemento y habilidad di tur cu kier participa.

   Aruba tambe ta beneficia di e oportunidad aki como cu nos ta forma parti di Reino Hulandes.

   Por ultimo nos kier menciona cu no ta prome biaha cu Pius X School ta participa na un intercambio educativo den exterior. Den pasado un grupo a logra bay Spaña y tambe Finlandia. Pius X School tabatin e honor tambe pa ta un scol huesped pa ricibi un grupo di maestronan for di Spaña tambe. Y asina Pius X School ta sigui traha na desaroya e diferente competencianan di cada un di su maestronan.