Ronnie Cornelie cu su edad grandi keto bay ta coriendo Brommer

E tin ningun plan pa bay stop!

ORANJESTAD (AAN): Recientemente durante e inespera Warm-Up Ride cu algun miembro di Shoco Legends y demas grupo a participa na dje, DIARIO a topa cu e conocido ciudadano Ronnie Cornelie.  Un persona kende no obstante su edad grandi, keto bay ta haya placer di bida door di core Brommer unda cu ta riba e isla.

   Den un entrevista, el a splica cu den henter su bida el a yega di core diferente tipo di Brommer.  El a core for di Bromfiets, pa Brommer, Motorcycle, y tambe Harley Davidson.

   Hopi aña pasa el a yega di core e Bike di Dodo Farro, cu ta e tipo di Harleynan bieu.  Di e tempo ey caba e tabata core.

   Segun Ronnie, e tin como 60 aña coriendo motorcycle y e pasion pa esaki keto bay ta bibo.  El a bisa claramente cu e lo no bay stop tampoco.

   “Cu e edad cu mi tin aki, hopi hende ta puntrami: ‘Ainda bo ta riba e co’i ey?’ y mas.”

   Ronnie a subraya aki, cu tanten cu e por, e lo sigui core riba brommer.  E lo sigui core te dia cu e lo no por mas.

   “E dia cu mi no por core mas, keremi cu mi lo bay sinti’e fuertemente,” el a declara.  Pero e mes lo tuma decision e ora di bay stop.

   Cu su edad grandi, keto bay e ta coriendo y ta hasta participa den Rides.  Pero el a admiti si cu el a cambia di su co’i core.  El a stop di core Harley Davidson, y awor ta moviendo riba un Honda motorcycle.

   El a tende algun hende ya caba ta tent’e, cu “hende a baha for di Harley y awor ta riba Honda”, aunke un tiki sarcastico sigur.   Pero Ronnie a trece un splicacion pakico el a haci esey.

   El a bin debi cu Harley Davidson ta hopi peso, y cu su edad grandi dado momento e no por domina facilmente mas e peso cu un Harley tin awendia.

   “Awor mi ta riba un Honda, un motorcycle chikito pero cu ta hibami tur caminda,” el a declara.  “E ta core bon-bon, sin ningun problema, y si mi cay cune mes, ta facil pa mi hise bek di abao, pues mi ta contento.”

   E Honda cu e ta coriendo ta uno di 250cc, cu un motor basa riba carburator, y e tin como 35 aña bieu.  Ronnie a bisa cu su yiu a manda e Honda ey pe for di Hulanda.  E mes na su turno a manda su Harley bieu pa su yiu na tera frieu.

   E ta orguyoso di su Honda, cu aunke e ta 35 aña bieu, toch e motorcycle di color neon berde ta coriendo bon keto bay.  Aunke pa chiste, el a pone e nomber ‘Hardly Davidson’ riba dje.