Autoridad Federal ta pone nan paga e dama awor suma di 75 mil Dollar
ORANJESTAD (AAN): E caso a ser atendi den Corte Federal na Miami como dos siman pasa, y ta uno basta serio! Pasobra autoridadnan federal ta convenci cu e aerolinea Aruba Airlines a dicidi na retira un empleada, djis pasobra el a sali na estado.
Y pa leynan federal, e acto di retiro aki ta un violacion flagrante di reglanan estableci pa evita e tipo di discriminacion aki. Pesey mesora asina cu e denuncia a drenta, e Comision di Equal Employment Opportunity Commission (EEOC) a dicidi na hiba Aruba Airlines dilanti Huez.
Den un boletin emiti pa EEOC dia 28 di Februari 2023, nan a duna informacion di e caso serio aki y a dune e nomber di ‘Pregnancy Discrimination Lawsuit’. Un caso serio caminda cu oficialnan di Human Resources a pega barco malamente.
Malhecho cu Belisa Gomez: Aunke den nan prome relato, Comision EEOC no a duna nomber di e empleada cu a haci e denuncia. Sinembargo prensa na Miami rapidamente a publica cu e dama Belisa Gomez ta esun cu a pasa den e situacion aki.
Den Corte Federal na Miami, e Comision EEOC a acusa Aruba Airlines di a retira Belisa Gomez, un Analista Financiero djis pasobra el a sali na estado.
Aruba Airlines su oficina na Miami a tuma Belisa Gomez den servicio. El a pasa su periodo di prueba satisfactoriamente, pero net dos luna despues cu el a ricibi un aumento salarial, el a bin descubri cu el a sali na estado. Esey tabata na April 2018.
Pa su sorpresa, Aruba Airlines a retir’e menos di dos luna despues, esta 15 di Juni 2018. Pues aki por conclui, cu apenas seis luna cu el a wordo tuma den servicio di Aruba Airlines como Analista Financiero, e compania a kite di trabao.
Den Corte, Aruba Airlines a desmenti tur e acusacionnan aki cu autoridad federal a trece dilanti.
Sinembargo na final a yega na un palabracion, cu Aruba Airlines lo paga 75.000 Dollar como parti di un ‘Decreto di Consentimento’.
Den e ‘Decreto di Consentimento’ aki, oficialmente “Aruba Airlines ta nenga e acusacionnan aki, y ta declara, cu door di acepta e Decreto di Consentimento aki, e no ta admiti ningun infraccion ni violacion di ley.”
Training awor pa tur manager: Sinembargo, Aruba Airlines tin di paga Belisa Gomez e suma di 75.000 Dollar pa daño y perhuicio, y ta drenta den un ‘Decreto di Consentimento’ di 4 aña cu Comision EEOC, cu ta exigi cu tur miembro di Human Resources y di Gerencia di e aerolinea tin di bay haya training extra pa siña con pa stop discriminacion, y stop di tuma represaya tambe.
Pues si Aruba Airlines cuminza bula bek riba teritorio Mericano, e tin di adopta y promove e reglanan contra discriminacion na personal di recurso humano, manager- y empleadonan pa sigura cu empleadonan ta na altura di nan derechonan, y procedimento di keho, y tambe gerencia y personal di human resources ta na altura di nan obligacion pa evita discriminacion na trabao, y con pa atende reclamonan.
E ‘Decreto di Consentimento’ aki tambe ta rekeri di Aruba Airlines pa cuminza manda rapport na Comision EEOC di cualkier keho di discriminacion di embarazo, y splica den rapport con nan a reacciona pa cada keho.
No obstante cu Aruba Airlines a ‘settle’ e caso aki pagando e 75.000 Dollar aki, toch Comision EEOC ta opina cu e aerolinea a viola e ley Civil Rights Act di 1964 cu ta prohibi discriminacion a base di embarazo. Pero nan ta contento cu Aruba Airlines na final a dicidi na coopera cu Comision EEOC pa resolve e asunto.
Prome cu e caso a yega den Corte Federal, ya caba Comision EEOC a trata di yega na un solucion satisfactorio cu Aruba Airlines. Pero Aruba Airlines no a logra yega na un acuerdo, y pesey EEOC a djis manda e caso dilanti Huez.
