Ronella Croes di ATA mustrando pa ban keda mantene loke Covid-19 a siña nos

ORANJESTAD (AAN): Durante e ceremonia di conmemoracion di dos aña di Covid-19 na Aruba, C.E.O. di A.T.A., Ronella Croes a comparti algun palabra.

A inicia cu enfoke riba e impacto cu Covid-19 tabata tin riba e industria di biahe y turismo mundialmente, y especialmente kico esaki a nifica pa Aruba mirando nos dependencia di turismo.

  A toca e tema di ceramento y reapertura di nos fronteranan na 2020, e strategia di reapertura, particularmente pa e mercado di Estados Unidos, mirando cu Aruba tabata un di e promenan pa habri back pa e mercado ey y a splica cu esaki tabata un risico calcula cu a worde tuma, demostrando liderazgo y curashi di parti di Aruba.

   Tambe a menciona cu recuperacion ta riba bon caminda y na aña 2021, Aruba a recupera 72% di bishitante den comparacion cu 2019, sobrepasando e scenario optimista defini pa 2021. Na esaki Señora Croes a agrega cu Aruba tin un di e gradonan di recuperacion mas halto den region y segun proyeccion pa 2022, Aruba lo por yega cerca di e nivel di 2019.

   Adicionalmente di e tema di turismo, a papia tambe di e impacto cu Covid-19 tabata tin riba nos bida diario y con den nos comunidad tin persona cu a perde trabao, a sinti e efectonan riba nan salud mental y tambe personanan cu a perde miembronan di famia y amistadnan.

   A uza e espacio aki pa recorda nos comunidad cu resiliencia ta parti di ken nos ta y esaki sigur a keda demostra durante e pandemia. Tabata tin hopi momento dificil, pero nos a siña tambe pa aprecia nos hendenan, lugarnan y momentonan paso nos a wak con facil ta pa perde nan.  Nos a haya e oportunidad di observa nos naturaleza den su gloria natural. Nos por a sumergi nos mes den e beyesa di nos isla. Nos por a comparti experiencianan nobo cu sernan keri. 

  “Mientras nos ta sigui adapta na e realidad nobo cu nos ta aden, si nos sigui traha hunto y nos sigui haci uzo di nos resiliencia Arubiano, nos lo yega hopi leu. Laga nos mantene e enseñansanan aki cu Covid-19 a laga pa nos. Nos ta resiliente, nos tin e forza ey, cada persona tin’e ... no lubida, aunke kisas algun ta sinti cu e ta dificil pa detecta. Nunca entrega y semper keda bay dilanti, paso a paso.”