Nan a ricibi carta di apoyo di Patrona Real Prinses Beatrix
ORANJESTAD (AAN): E organizacion di e Red di Dutch Caribbean Nature Alliance (DCNA), lo bay tene su proximo reunion di Hunta di Maneho na St. Maarten. DIARIO a haya sa cu esey a cuminza caba Dialuna 14 di Maart y ta sigui te dia 17 di maart.
E Hunta di Maneho di DCNA ta di suma importancia pa discuti y elabora strategia tocante e forma mas efectivo di apoyo na e organizacionnan di maneho di area proteha den Caribe Hulandes, specialmente den bista di e desafionan importante cu e pandemia global di Covid-19 a causa y otro presion cu e Organizacionnan di Maneho di Parke ta haya nan confronta cu ne.
E Organizacionnan di Maneho di Parke tambe tin oportunidad di mantene nan mes na haltura di algun di e desafionan y exitonan cu e parkenan ta experimentando, mientras cu nan ta sigui salvaguarda naturalesa den Caribe Hulandes.
Durante e reunion semestral ta tuma varios decision di gobernacion tambe, incluyendo decision relaciona cu bon gobernacion financiero, desembolso di Fondo Fiduciario pa Conservacion di DCNA y e apoyo cu red DCNA ta brinda den termino di su lobby regional y internacional den nomber di e organizacionnan conservacionista den Caribe Hulandes.
Red di conservacion DCNA ta brinda apoyo na e organizacionnan di maneho di aerea proteha di e seis islanan di Caribe Hulandes: Fundacion Parke Nacional di Aruba, STINAPA Bonaire, CARMABI Curaçao, STENAPA St. Eustatius, Saba Conservation Foundation y St. Maarten Nature Foundation. Otro componente critico cu lo discuti durante e Hunta di Maneho ta e importancia di implementacion di un strategia cu lo yuda fomenta desaroyo di turismo sostenibel pa e islanan, permitiendo Caribe Hulandes sali di e desafionan causa pa e pandemia cu un mayor enfoke riba economia berde y blauw.
Ademas di e gerentenan di conservacion y e diverso expertonan di e Hunta di Maneho di DCNA, observadonan di Fondo Mundial pa Naturalesa di Hulanda (WWF-NL), Union Internacional pa Conservacion di Naturalesa (IUCN-NL), BirdLife Hulanda, Observacion Internacional y Ministerio di Agricultura, Naturalesa y Calidad di Alimento (LNV) tambe ta participa na e reunionnan di Hunta di Maneho di DCNA.
E Patrona Real di DCNA, Prinses Beatrix di Hulanda, tambe a elogia recientemente e Organizacion di e Red di Conservacion pa su Congreso di Hunta recientemente organizado cu a tuma luga na november aña pasa na Curaçao. Durante un carta oficial di Palacio Real na e Presidente di DCNA, Dra. Hellen van der Wal, e prinses a elogia e organizacion pa su apoyo continuo na e organizacionnan di maneho di area proteha na e seis islanan y, en especial, proporcionando medio na e organizacionnan di naturalesa pa ehecuta nan tareanan.
Riba e potret Gerente di Oficina di Secretariat Emeray Martha-Neuman di DCNA ta presenta un obsekio na Prinses Beatrix pa ta Patrona Real di DCNA durante diescinco aña.
