Aruba den 'blackout' --- *Ta sospecha cu tabata tin un kortsluiting
ORANJESTAD (AAN): Diamars mainta, algun minuut pasa di 11 or, Aruba completo tabata den 'blackout'. Asina cu coriente a bay, e reaccionnan a cuminsa drenta for di tur skina riba social media indicando e situacion cu a presenta.
Practicamente mesora, WEB Aruba N.V. a informa cu a surgi un fayo den e planta na Balashi y cu esaki a resulta den un 'blackout' total pa e isla.
N.V ELMAR tambe a laga sa cu e interupcion den e suministro di coriente tabata pa motibo di un problema den e planta di produccion na WEB Aruba N.V.
Pa 12:41 pm algun bario rond di Aruba a logra recupera e suministro di coriente manera Santa Cruz, Sabana Berde, Paradera, Wayaca, algun parti di Playa.
Mas informe relaciona cu e situacion a cuminsa circula pa 1:13 pm. A informa cu 60% di suministro di coriente a wordo recupera den diferente bario.
Pa 1:49 pm ora cu WEB Aruba NV a laga sa cu a recupera 80% di suministro di coriente na NV ELMAR.
Ya pa 1:54 pm e recuperacion di e suministro tabata den 85% y tur motor RECIP tabata den operacion y e boilernan so mester a lanta.
Un investigacion preliminar a mustra cu tabata sospecha cu tabata tin un kortsluiting den e cashi di interconexion entre un turbine generator y e transformador. E kortsluiting a causa un explosion cu consecuencia cu e sistema a shut down completamente pa safety. No tabata tin personanan herida.
Asina mes e situacion di coriente a keda delicado y debi na esaki mester a saca algun area bek for di servicio.
Areanan cu ta afecta ta entre otro: Shaba, Tanki Leendert, Seroe Janchi, Matadera, Sabana Liber, Montaña, Seroe Lopes, Piedra Plat, Cumana, Seroe Biento, Catiri, Moko, Jaburibari, Bloemond, Nune, Papaya.
UPDATE SITUACION DI CORIENTE 4:51 PM: e situacion di coriente atrobe tabata instabil tanto na N.V ELMAR como na WEB. Esaki a pone cu cierto area cu a haya coriente atrobe a experencia un interupcion.
Areanan cu tambe ta sin coriente ta Savaneta, San Nicolas y Palm Beach un parti.
ULTIMO UPDATE: Pa 6:28 pm a logra pone e turbina di gas bek den servicio locual a nifica cu WEB tabata casi completamente bek online. Y pa 6:37 pm, WEB a informa cu a logra 100% di suministro di coriente na NV ELMAR.
WEB Aruba N.V a haci un peticion na tur persona cu a haya daño den algun aparato pa acudi na N.V ELMAR pa yena un formulario pa evaluacion.
Na total, durante practicamente 7 ora Aruba a experencia problema cu suministro di coriente. Despues cu situacion di coriente normalisa, lo haci un investigacion mas profundo.
