ORANJESTAD (AAN) – Minister Glenbert Croes, titular di Labor, Energia y Integracion (DIMAS), den conferencia di prensa di Gobierno, Dialuna,
a elabora tocante e tema di DIMAS y tur su problematica cu a wordo constata for di aña 2008, pues, 14 aña pasa, segun palabranan di e mandatario.
Minister Croes a declara cu dia 9 di Maart ultimo, el a institui un Management Team, y a raiz di cierto cambionan cu el a haci den esaki caba, den e conferencia di prensa aki e kier a menciona e nombernan y constelacion di miembro di e Management Team cu lo ta encarga cu e Ley di DIMAS.
Presidente di e Management Team lo ta Lirriane Frias, Presidente; y e siguiente personanan ta miembro: Edgard Arends, Henry Baarh, Beleids Adviseur pa Ministerio di Labor, Energia y Integracion; Jennifer Tromp, Begrotings Adviseur. Durante cuater aña el a ocupa e funcion aki pa Ministerio di Husticia, y awor pa e cartera di Minister Glenbert Croes.
E mandatario a splica cu como el a apunta Lirriane Frias como Presidente di e Management Team, e mester a haci un cambio den e Decreto di dia 9 di Maart.
Esaki, e dignatario a bisa, e ta use como un ehemplo den henter e discusion cu a surgi door di e acusacion falso cu señora Paskel, director di DIMAS, a haci contra dje. Y pa tal motibo el a dicidi di instala un comision y un constelacion cu a culmina den e Management Team presidi pa Lirriane Frias.
Minister Glenbert Croes a expresa, finalmente, cu pasobra ta bay bin un decreto nobo pa haci e cambio, no kiermen cu por acusa e minister di ta “anti-berdad” of cu ta falsifica decreto pa institui un comision.
