ORANJESTAD (AA): Nos Himno y Bandera ta celebra e rikesa di nos su naturalesa, nos lama blauw, playanan blanco, flora y fauna nativo y formacion geologico ta fuente di inspiracion pa nos simbolonan nacional.
Conservacion di e biodiversidad y ecosistemanan natural di Aruba ta sumamente importante pa mantene e identidad di nos baranca tan stima bibo.
Fundacion Parke Nacional Aruba (FPNA) kier invita e pueblo di Aruba pa bishita Parke Nacional Arikok durante e celebracionnan di Himno y Bandera. Manera ta custumber riba Dia di Himno y Bandera, 18 di maart, FPNA ta celebra e dia nacional aki cu Entrada di Conservacion gratis pa Parke Nacional Arikok pa residentenan. Tur bishitante residente mester comproba cu nan ta registra na Aruba cu un ID valido. E Entrada di Conservacion pa bishitantenan internacional ta keda vigente.
Riba dia di Himno y Bandera FPNA ta organiza diferente actividad gratis cu ta informativo y recreativo. Esakinan lo tuma lugar na Mangel Halto informacion di Mangel y Bida Marino, Spaans Lagoen actividad di Yoga y Meditacion, Parke Nacional Arikok caminata informativo pa Cunucu Arikok of Miralamar, Bubali Plas informacion di importancia di Saliñanan.
Participacion pa e actividadnan aki ta limita y registracion lo tuma lugar riba e Facebook Page di Fundacion Parke Nacional Aruba.
Ban sigui celebra y conserva nos rikesa natural pa asina conserva nos identidad nacional.
