Robby Rosel cu yamada na comunidad pa yuda elimina autonan bieu sin uso for di caminda publico

*Of den cura di cas of su dilanti

ORANJESTAD (AAN)—Manera ta conoci, Robby Rosel, Relacionista Publico di Bureau City Inspector a yega di informa cu na Mei ultimo, mester a cuminza cu accion di piki autonan cu a keda para riba caminda, y a haci un yamada na comunidad di Aruba pa duna BCI tips, di unda e autonan aki ta para.

Esaki pa BCI manda patruya cerca esakinan y por traha un lista pa por pasa na e barionan, manera a yega di hacie caba dos aña atras.

Lamentablemente, CBI no a ricibi reaccion pa esaki. Yamadanan cu nan a haya ta solamente pa autonan cu ta mal staciona riba acera, locual no ta tarea di CBI pa handle cu ne.

“Pesey nos kier a pidi na cada ciudadano den comunidad cu por mira autonan bieu para riba acera, of cu tin plachi number, of cu ta core, eseynan no ta cay bao Bureau City Inspector, sino directamente ma Cuerpo Policial cu ta esnan cu tin cu bay kita nan y hiba nan sea na Balashi te ora por papia cu e doñonan di auto”, el a splica.

Locual si ta cay bao di BCI ta e autonan cu ta wacharaca of autonan bieu cu no tin motor, cu no ta sirbi y cu ta simplemente pa benta afo.

“Si bo tin autonan bieu para den cura di bo cas, of bo ta mire riba tereno publico, libremente bo ta yama nos y nos ta manda patruya y takel wagen pa kita esakinan for di e sitio”, Rosel a indica.

Of personanan cu tin un auto bieu cu tin motor, etc., pero cu no ta wordo uza mas, por yama City Inspector pa kite for di e cura di cas of unda e ta para, pero e persona mester firma un autorizacion pa BCI por tume y use como heronan bieu.

 “Nos ta haci un suplica un biaha mas na comunidad di Aruba pa por fabor yama nos na 582 9777 y nos lo pasa kita e autonan bieu aki for di dilanti bo cas of den e cura, of riba tereno publico, pa asina por elimina esakinan”, Robby Rosel, PR di BCI a reitera.