ORANJESTAD (AAN): Riba 20 di Juli den nomber di Asociacion de Colombia hunto cu High Performance y Elite Productions ta bay tuma lugar un concierto pa celebracion di Dia di Independencia di Colombia.
Esaki ta bay tambe den cooperacion cu Eagle Resort & Casino y Romar Trading.
Segun Reynold Kelly di High Performance, for di basta aña e tabata tin pensa di organiza e tipo di concierto aki y awor cu dia 20 di Juli ta cay riba un Diasabra, esaki ta ideal.
“Riba 20 di Juli nos ta bay celebra Dia di Independencia di Colombia na grandi riba Harbor Arena cu tres artista internacional, cu tin di haber cu cultura di Colombia”.
Nos lo cuminza cu un banda cu ta bay duna un homenahe na Dario Gomez, kende tabata canta mas tanto cancionnan di despecho y a fayece den luna di Juli di 2022.
Esaki segun Kelly, kende a indica cu ta bay tin baliamento di salsa tambe, mirando cu un otro banda cu ta bay presenta na e concierto ta Los Adolescentes, cu ta bin directamente for di Miami.
“E artista principal di e anochi ta bay ta Nelson Velasquez, kende despues di 16 aña ta bay ta bek na Aruba pa presenta su cancionnan di vallenato”, segun Kelly.
Pa loke ta e parti local, ta bay tin presentacion di DJ Sky, Andrew Mix y e banda nobo cu ta causando furor na Aruba, ‘Shine Music’.
{gallery}Riba Dia di Independencia di Colombia ta bay tuma lugar concierto di despecho, salsa y vallenato{/gallery}
