ORANJESTAD (AAN): E conocido Addonsito Croes, docente y presentador local, tabata ‘live’ den e programa di e emisora “Nacht van KRO NCRV” na Hulanda.
Net prome cu e dia di Himno y Bandera, un di e emisoranan mas scucha na Hulanda, cu promedio 2.5 miyon scuchado, a invita meneer di Geschiedenis Addonsito Croes di Filomena College Mavo, p’e por a duna un splicacion, na Hulandes, di con Aruba a yega na su simbolonan nacional.
Esaki tabata den e nachtprogramma di Radio 1 NCRV KRO di Dj Benji Heerschop.
Addonsito tawatin e honor di splica pa 10 minut un tiki dje historia y nificacion di nos simbolonan nacional, cu ta e himno y nos bandera. E segmento a cuminsa cu un fragmento di nos himno Aruba Dushi Tera.
Den su entrevista, Addonsito a conta con e deseo pa separacion a cuminsa aki na Aruba desde e tempo cu nos tabata forma parti di Colonia Curaçao y cu tabata e 2147 firmantenan, na 1948, esunnan cu a duna inicio na Aruba su separacion, bou guia di sr. Shon A Eman dfm.
Tambe el a conta con su omo sr. Betico Croes dfm. ta esun cu a bini cu e idea pa Aruba por tin su mesun himno y su bandera, inculcando di e forma aki e amor patriotico den nos pueblo. Aki el a stimula mas ainda e deseo pa nos no forma parti mas di Antias Hulandes.
Na final dj Benji a gradici’e cu el a tuma su tempo educando tur scuchado algo di e isla cu tambe ta forma parti di Reino Hulandes. Ainda por scucha e entrevista aki na www.nporadio1.nl fragmenten: Dag van de vlag en het volkslied op Aruba.
