Resultado di estudio haci na Aruba ta demostra e importancia pa e isla enfoca riba Turismo Responsabel

ORANJESTAD (AAN): Manera indica den otro articulo, Aruba Tourism Authority pa prome biaha tabata presente na Climate Week NYC 2025,

demostrando un compromiso real cu turismo responsabel. 

   Climate Week NYC ta un evento anual cu ta tuma luga na New York durante e mesun siman cu e General Assembly di Nacionnan Uni ta tuma luga. Entre 21 cu 28 di september, mas di 100 di compania, organisacion gubernamental y NGO’s ta organisa mas di 1000 evento. Durante Climate Week, lider, inovador, organisacion y comunidad di tur parti di mundo ta reuni pa enfrenta retonan urgente relaciona cu cambio climatico y sostenibilidad. E enfoke principal ta pa yega na solucionnan practico y pa stimula colaboracion.

    Lansamento di e Responsible Tourism Impact Report: Ta asina cu a amplifica A.T.A. su presencia a traves di e lansamento di e Responsible Tourism Impact Report, dia 23 di september. E estudio aki ta disponibel riba Aruba.com y ta presenta resultado di un estudio global di mas cu 7.000 biahero. Resultadonan ta mustra cu 96% di participante ta kere cu Turismo Responsabel ta importante, 74% ta compronde cu cambio climatico ta pone islanan den riesgo, y 73% ta desea di haci un impacto positivo pero solamente 23% ta indica di a haya e guia con pa haci esaki.

   E lansamento aki a logra un cobertura amplio den medio internacional, incluyendo Travel Agent Central, Travel Pulse Canada, Canadian Reviews, Hospitality Trends, Hotel News Resource y Travel and Tour World. E relato di prensa a logra yega na un audiencia di mas cu 98 miyon. E cobertura a refleha interes amplio y ta logrando un impacto mundial exitoso.

   E Responsible Tourism Impact Report ta reafirma cu turismo responsabel ta esencial pa futuro di islanan, incluyendo Aruba. E resultadonan ta mustra cu bishitantenan ta balora sostenibilidad, ta compronde e riesgo climatico pa islanan, y ta desea di haci un impacto positivo, pero ta falta guia pa logra esaki. Esaki ta un yamada na tur negoshi pa alinia nan practicanan cu e standard di turismo responsabel, sigurando cu turismo ta beneficia comunidad,  medio ambiente y futuro generacionnan.

   E resultadonan ta un yamada pa accion. E ta confirma cu turismo responsabel no mester wordo mira como un niche, pero cu e ta un standard.  A.T.A. a cuminsa  implementa iniciativanan concreto cu ta facilita e huespednan pa scoge di haci mas di e cosnan cu ta bon pa Aruba.  A.T.A. ta invita tur stakeholder, local y internacional, pa traha hunto riba un futuro den cual turismo ta fortalece comunidad, proteha naturalesa y laga un impacto positivo y duradero.